Qasym-Jomart Toqaevqa Ekologiia, geologiia jáne tabiǵi resýrstar ministrliginiń biylǵy 9 aida atqarǵan jumystarynyń negizgi baǵyttary jóninde esep berildi, dep habarlaidy Aqordanyń baspasóz qyzmeti.
Maǵzum Myrzaǵaliev Prezidentke Ekologiia kodeksiniń Májiliste qaralyp jatqany týraly egjei-tegjeili baiandady. Memleket basshysy atalǵan qujatqa oń baǵa berip, elimizdegi ekologiialyq jaǵdaidy jaqsartýǵa baǵyttalǵan jańalyqtardy atap ótti. Qasym-Jomart Toqaevtyń pikirinshe, bul qujattyń airyqsha mańyzdylyǵy qoǵamdy tabiǵatty aialaýǵa shaqyrý jáne aýany lastaityn ziiandy zattardyń kólemin azaitýǵa bailanysty.
Ekologiia, geologiia jáne tabiǵi resýrstar ministri Prezidentke biylǵy vegetatsiialyq kezeńniń ótýi jáne sý resýrstarynyń jaǵdaiy týraly málimet berdi. Onyń aitýynsha, biyl sý deńgeiiniń tómen bolýyna jáne sý tapshylyǵy qaýpine qaramastan vegetatsiialyq kezeń salystyrmaly túrde turaqty ótti.
Sonymen qatar Memleket basshysyna sý salasyn tsifrlandyrý týraly baiandaldy. Maǵzum Myrzaǵaliev Túrkistan oblysy Maqtaaral aýdanynda sý arnasyn tsifrlandyrýdyń pilottyq jobasynyń aiaqtalǵany týraly aitty. Bul sý shyǵynyn aitarlyqtai azaitýǵa múmkindik berdi. Osy rette, Prezident sýdy tiimdi paidalaný qajettigine nazar aýdardy.
Budan bólek Qasym-Jomart Toqaevqa balyq sharýashylyǵynyń jaǵdaiy jáne osy baǵytty damytýdyń salalyq baǵdarlamasynyń ázirlený barysy týraly aqparat berildi. Ministrdiń aitýynsha, Qazaqstan sý qoimalarynyń áleýeti balyq ósirý kólemin jylyna 7,5 myń tonnadan 600 myń tonnaǵa deiin arttyrýǵa múmkindik beredi. Bul balyq eksportyn 300 myń tonnaǵa deiin ulǵaitýǵa yqpal etedi.
Kezdesý sońynda Qasym-Jomart Toqaev Maǵzum Myrzaǵalievke birqatar naqty tapsyrma berdi.
