Beinebailanys rejiminde ótken kezdesýde Qasym-Jomart Toqaev pen Lakshmi Mittal «ArselorMittal Temirtaý» kompaniiasynyń jumysyna qatysty birqatar ózekti máseleni talqylady, dep habarlaidy "Ult aqparat" Aqordaǵa silteme jasap.
Prezidentke kompaniianyń investitsiialyq baǵdarlamasy jáne óndiristi ulǵaitý, ónimniń jańa túrlerin shyǵarý, sondai-aq Qazaqstanmen aldaǵy ýaqyttaǵy seriktestik aiasynda áleýmettik mindettemelerdi oryndaý jónindegi jospary týraly málimet berildi. Sondai-aq qural-jabdyqtardy jańartý, materialdyq-tehnikalyq bazany jaqsartý, kásiporyndardaǵy eńbekti qorǵaý máseleleri qarastyryldy.
Memleket basshysy qaýipsiz jumys ortasyn qamtamasyz etýdiń, halyqaralyq qaýipsizdik talaptaryn saqtaýdyń jáne qyzmetkerlerdi oqytýdyń asa mańyzdy ekenin atap ótti. Qasym-Jomart Toqaev qazaqstandyq jumysshylarǵa laiyqty eńbekaqy tólenýge tiis ekenin aitty.
Sonymen qatar «ArselorMittal Temirtaý» kompaniiasynyń 2024 jylǵa qarai qaldyqtardy 30 paiyzǵa, al 2030 jylǵa qarai 50 paiyzǵa azaitý, sondai-aq osy strategiiany iske asyrýǵa Qaraǵandy oblysynyń jurtshylyǵyn tartý úshin qabyldap jatqan sharalaryna erekshe nazar aýdaryldy.
