Memleket basshysy Qasym-Jomart Toqaev Qyzylorda óńiriniń ákimi Gúlshara Ábdihalyqovadan qurylys qarqynynyń baiaýlaý sebebin surady. Prezidenttiń aitýynsha óńirde qurylys qarqyny 27 paiyzǵa tómendep ketken, dep habarlaidy QazAqparat.
«Gúlshara Naýshaqyzy, halyqty baspanamen qamtamasyz etý – ózekti másele. Statistikaǵa qarasaq, byltyr Qyzylorda oblysynda qurylys qarqyny 27 paiyzǵa tómendegen. Turǵyn úilerdi paidalanýǵa berý 20 paiyzǵa azaiǵan. Bul memleket boiynsha eń tómengi kórsetkish. Jaǵdaidy túzeý úshin ne istep jatyrsyzdar? Bul másele boiynsha qandai josparlaryńyz bar?» - dep surady Qasym-Jomart Toqaev Úkimettiń keńeitilgen otyrysynda Qyzylorda oblysynyń ákiminen.
Bul suraqqa jaýap bergen Gúlshara Ábdihalyqova pandemiia men nesielik úilerge suranystyń azaiýyna bailanysty qurylys salasynyń kórsetkishi tómen bolǵanyn aityp ótti.
«Qazir kezekte turǵan 30 270 adam bar. Onyń ishinde «Otbasy banki» salymshylarynyń ózi ǵana – 8 myń adam. Onyń ishinde tek 600 adam ǵana birinshi jarnany tólei alatynyn dáleldep otyr. Problemalar bar. Biraq biz biyl aldymyzǵa jospar qoidyq: 644,7 myń sharshy metr úi beriledi. Onyń ishinde birinshi Qyzylorda qalasy jáne aýdandar boiynsha arnaiy úi salý infraqurylymdaryn daiyndap qoidyq. Ekinshiden, Úkimetpen birge qazirgi baǵdarlamalarǵa bailanysty arendalyq jáne nesielik úiler boiynsha jumys isteimiz», - dedi ol.
