Foto: Aqorda
Prezident Qasym-Jomart Toqaev Antaliia diplomatiialyq forýmynyń «Mapping Tomorrow, Managing Uncertainties» paneldik sessiiasyna qatysty. Memleket basshysy búgingi kóshbasshylardyń boiynan tabylýǵa tiis qasietterge toqtaldy, dep habarlaidy Ult.kz.
– Jahandyq kóshbasshylar, álemniń ár qiyryndaǵy jekelegen memleketterdiń jetekshileri, eń aldymen, halyqaralyq qaýipsizdik pen beibitshilik máselelerine jaýapkershilikpen qaraýy qajet dep sanaimyn. Qazirgi sátte strategiialyq ustamdylyq óte mańyzdy. Meniń oiymsha, búgingi kúrdeli ári qarama-qaishylyqqa toly álemdegi shielenisterdiń túiinin tarqatý asa qiyn emes. Jai ǵana jaýapkershilik tanytyp, sabyrly bolý qajet, – dedi Qazaqstan Prezidenti.
Foto: Aqorda
Memleket basshysy Taiaý Shyǵystaǵy ahýalǵa qatysty pikirin jetkizdi. Prezident kelissózder barysynda basty máselelerge den qoiý kerek dep sanaidy.
– Álemde oryn alǵan jaǵdailarǵa baiyppen qaraýǵa keńes berer edim. Máselen, bári Irandy talqylap jatyr. Árine, bul eldegi ahýal óte kúrdeli. Oǵan qatysty qandai da bir pikir aitý qiyn. Qazaqstan Shyǵanaqtaǵy elderge tilektestigin bildirdi. Biz taraptardy strategiialyq ustamdylyqqa jáne áskeri is-qimyldy toqtatýǵa shaqyrdyq. Bul qaqtyǵystyń aýyr saldaryn bári sezindi. Eń áýeli ekonomika quldyrady. Búginde Ormýz buǵazynda kemelerdiń erkin júzýine qoiylǵan tosqaýyl týraly aitylyp jatyr. Biraq dálizdiń qaqtyǵysqa deiin erkin saýda jasaýǵa ashyq bolǵanyn eskerý qajet. Sondyqtan máseleniń mánine úńilgenimiz jón. Al túitkil iadrolyq tehnologiia men iadrolyq qarýdyń taralýynda edi. Bul Iran tóńiregindegi qaqtyǵysqa qatysty kelissózderdiń basty taqyrybyna ainalýy kerek. Biraq qazir jahandyq saýda máselesin talqylaýǵa kóship kettik. Qiyndyqtarǵa qaramastan, ǵalamdyq saýda-sattyq kólemi ósip keledi. Byltyrdyń ózinde ósim 2,5 paiyzdy qurady. Iaǵni álemdik saýdadaǵy jaǵdai jaman emes. Alaida saýda-sattyqtyń sapasy men mazmuny – úlken problema, – dedi Qasym-Jomart Toqaev.
