Foto: Aqorda
Qasym-Jomart Toqaev Deni Sassý-Ngessoǵa iltipat bildirip, onyń elimizge bul saparynyń tarihi mańyzy zor dep baǵalady.
"Qazaqstanǵa qosh keldińiz! Sizdiń bul alǵashqy saparyńyz eki el bailanystaryn damytýǵa tyń serpin beretinine senimdimin. Qazaqstan men Kongo arasyndaǵy yqpaldastyqty odan ári damytýǵa mol áleýet bar dep esepteimin", – dedi Memleket basshysy.
Deni Sassý-Ngesso qurmet kórsetkeni úshin Qasym-Jomart Toqaevqa alǵys aityp, Qazaqstannyń qazirgi saiasi jáne ekonomikalyq damýdaǵy jetistikterin joǵary baǵalady.
"Elderimiz arasyndaǵy diplomatiialyq qatynastardyń 25 jyldyǵy qarsańynda Astanaǵa kelý – biz úshin zor mártebe. Bul sapar saiasat, diplomatiia jáne ekonomika salalaryndaǵy bailanystardy odan ári nyǵaita túsetinine, al eki el halyqtarynyń dostyq qatynastaryn jańa deńgeige kóteretinine senemin", – dedi Kongo Prezidenti.
Kelissóz barysynda taraptar Qazaqstan men Kongo arasyndaǵy ekijaqty yntymaqtastyqtyń damý perspektivalaryn talqylady. Sondai-aq halyqaralyq jáne aimaqtyq kún tártibindegi ózekti máseleler jóninde jan-jaqty pikir almasty.
