Prezident Qasym-Jomart Toqaev tanymal qoǵam qairatkeri, ekolog, ekonomika ǵylymdarynyń doktory Saltanat Temirqulqyzy Rahymbekovanyń dúnieden ótýine bailanysty onyń jubaiy, «Ulttyq agrarlyq ǵylymi-bilim berý ortalyǵy» kommertsiialyq emes aktsionerlik qoǵamynyń basqarma tóraǵasy Tóleýtai Rahymbekovke jáne otbasy men jaqyndaryna kóńil aityp, jedelhat joldady.
Bul týraly "Ult aqparat" Aqordanyń baspasóz qyzmetine silteme jasap habarlaidy.
«Saltanat Temirqulqyzy ár jyldary qorshaǵan ortany qorǵaý, turǵyn úi-kommýnaldyq sharýashylyǵy salasyn jetildirý, sondai-aq, «Jasyl» ekonomikany damytý baǵytynda kóp is atqardy. Qazaqstannyń kásipker áielderi odaǵynyń teń tóraiymy, Qazaqstan Azamattyq aliansynyń prezidenti bolyp, elimizdegi saiasi-qoǵamdyq jumystarǵa belsendi atsalysty. Marqumnyń jany jánnatta, imany salamat bolsyn», – delingen jedelhatta.
