Nursultan Nazarbaev Qazaqstan Respýblikasynyń Táýelsizdik kúnine arnalǵan saltanatty jiynǵa qatysty, dep habarlaidy "Ult aqparat" Aqordaǵa silteme jasap.
Memleket basshysy jiynǵa qatysýshylardy jáne barsha Qazaqstan halqyn ulttyq merekemiz – Táýelsizdik kúnimen quttyqtady.
Qazaqstan Prezidenti táýelsizdiktiń 27 jyly ishinde memleketimiz óziniń damý jolynda zor jetistikterge jetkenin atap ótti.
Elbasy egemen elimizdiń qurylý tarihynda Qazaqstannyń jas astanasynyń mańyzdy ról atqarǵanyna airyqsha toqtaldy.
– Eýraziianyń júreginde ornalasqan jańa elorda jańǵyrǵan Qazaqstannyń simvoly sanalady. Biyl Astanamyzdyń 20 jyldyǵyn elimizdiń barlyq óńirimen birge joǵary deńgeide atap óttik, – dedi Nursultan Nazarbaev.
Memleket basshysy Qazaqstanda júrgizilgen aýqymdy naryqtyq reformalar millionnan astam azamattarymyzdyń kásipkerlik qabiletterin ekonomikaǵa jumyldyrýǵa jol ashqanyn aitty.
– Ekonomikany júieli indýstriialandyrý óńdeý ónerkásibiniń úlesin aitarlyqtai arttyrýǵa septigin tigizdi. Búginde mundaǵy ónim kólemi shamamen 9,5 trillion teńgeni qurap otyr, – dedi Qazaqstan Prezidenti.
Sondai-aq, Elbasy kólik-logistika infraqurylymyna tartylǵan investitsiianyń arqasynda Qazaqstan qurlyqtyq mańyzy bar tranzittik habqa ainalǵanyn atap ótti.
Sonymen qatar, Nursultan Nazarbaev táýelsizdik jyldary tabysy eń tómengi kúnkóris deńgeiinen tómen turǵyndar sany 15 ese azaiyp, al naqty eńbekaqy 4 ese artqanyn aitty.
– Egemen Qazaqstannyń basty jetistikteriniń biri – halqymyzdyń sany 18 millionnan asyp, turǵyndardyń ortasha ómir súrý uzaqtyǵy 72,5 jasqa jetýi. Osy mańyzdy jeńisterimiz ben igi nátijelerimiz biz tańdaǵan baǵyttyń durys ekenin rastap otyr, – dedi Memleket basshysy.
Qazaqstan Prezidenti 2018 jyly elimizdiń syrtqy saiasatta da, jańǵyrý baǵdarlamalaryn iske asyrý aiasynda da qol jetkizgen basty jetistikterine toqtaldy.
– Bizdiń jaýapty ári syndarly syrtqy saiasatymyz álemdik arenadaǵy óz ornymyzdy aitarlyqtai nyqtai túsýge múmkindik berdi. Qazaqstannyń jemisti bitimgerlik qyzmeti Astanadaǵy Siriiaaralyq kelissózderdiń nátijeli bolýyna septigin tigizdi, – dedi Elbasy.
Sondai-aq, Nursultan Nazarbaev «Astana» halyqaralyq qarjy ortalyǵyn, «Astana hab» IT-startaptardyń halyqaralyq tehnoparkin jáne «Jasyl» tehnologiialar men investitsiialyq jobalardyń halyqaralyq ortalyǵyn iske qosý jónindegi jumystardyń nátijelerine nazar aýdardy.
– Qoǵamdaǵy birlik pen kelisim bizdiń barlyq jetistigimizdiń bastaýynda turǵanyn árdaiym este ustaýymyz kerek. Etnosaralyq jáne konfessiiaaralyq damýdyń qazaqstandyq modeli búginde halyqaralyq brendke ainaldy, – dedi Memleket basshysy.
Qazaqstan Prezidenti elimizdegi keiingi bastamalardyń bári turǵyndarymyzdyń turmys sapasyn jaqsartýǵa, qoǵamdyq qaýipsizdikti joǵary deńgeide qamtamasyz etýge jáne ál-aýqatymyzdy arttyrýǵa baǵyttalǵanyn atap ótti.
– Áleýmettik salany keshendi jańǵyrtý – bizdiń mańyzdy baǵytymyz. Táýelsizdik jyldary millionǵa jýyq azamatymyz baspanaly boldy. Biz jýyrdaǵy 5 jyl ishinde 70 million sharshy metrden astam turǵyn úi salamyz. Bul shamamen taǵy eki millionǵa jýyq qazaqstandyq baspanaly bolady degen sóz, – dedi Elbasy.
Sońynda Nursultan Nazarbaev táýelsiz el turǵyndarynyń qazirgi býyny ýaqyt talabyna sai bolyp, Qazaqstandaǵy árbir otbasynyń igiligi men berekesin nyǵaitýǵa úles qosatynyna senim bildirdi.
Memleket basshysynyń sóilegen sóziniń tolyq mátinin myna jerden oqi alasyzdar.
.jpeg)