Foto: Aqorda
Qasym-Jomart Toqaev «Expo» kórme ortalyǵyndaǵy etnoaýylda Naýryz merekesin jurtshylyqpen birge qarsy aldy, dep habarlaidy Ult.kz.
Prezident merekelik is-sharaǵa jinalǵan kópshilikti Naýryz meiramymen quttyqtap, jyly lebizin jetkizdi.
"Ulystyń uly kúni – ultymyzdyń ulyq meiramy. Bul – bizdiń ata dástúrimiz. Shýaqty kóktem merekesinde búkil dúnie qaita jańǵyrady. Kún men tún teńeledi. Qazaq eli áz-Naýryzdy kóne zamannan beri toilap keledi. Naýryz – eń aldymen, igilikti isterdiń merekesi. Osy kúnderi ár úide aq dastarhan jaiylady. El-jurt bir-birimen qaýyshyp, aq tilegin aitady. Muqtaj jandarǵa qaiyrymdylyq jasap, qamqorlyq kórsetedi. Ulystyń uly kúni biyl da qasietti Oraza aiymen tuspa-tus kelip otyr. Elimiz úshin munyń mán-mańyzy zor. Sebebi bizdiń dinimiz ben dástúrimiz – egiz. Qos qazynamyz halqymyzdyń biregei bolmysyn aishyqtai túsedi", – dedi Qasym-Jomart Toqaev.
Prezident Naýryz merekesi byltyrdan bastap jańa tujyrymdamaǵa sáikes on kún boiy atalyp ótetinine nazar aýdaryp, Naýryznamanyń ár kúni taǵylymǵa toly ekenin aitty.
"Naýryz – kóptegen shyǵys halyqtaryna ortaq mereke bolǵanymen, elimizde Ulystyń uly kúnin toilaýdyń erekshe dástúri bar. Bul meiramnyń tól mádenietimizdegi orny airyqsha. Sheteldik meimandar da mereke qarsańynda Qazaqstanǵa arnaiy kelip, bizdiń salt-dástúrimizben tanysady, ádet-ǵurpymyzdy tanyp-biledi. Biz osy rýhani qazynamyzdy jan-jaqty dáripteýimiz kerek. Naýryznama boiynsha búgin – Yntymaq kúni. Elimiz úshin aýyzbirshilik pen tatýlyqtyń orny qashanda erekshe. Búkil halqymyz ultyna, dinine qaramastan bir el bolyp, Naýryzdy birge atap ótedi. Biz osyndai bereke-birligimizdiń arqasynda bolashaqqa zor senimmen qarap, tek alǵa qarai qadam basyp kelemiz. Jan-jaqty reforma jasap, memlekettiń saiasi júiesin jańǵyrtyp jatyrmyz. Aýqymdy ekonomikalyq jobalardy qolǵa aldyq. Baisaldy syrtqy saiasatymyzdyń arqasynda Qazaqstan búkil álemge bedeldi memleket retinde tanymal boldy", – dedi Memleket basshysy.
Qasym-Jomart Toqaev Naýryz meiramynyń tazalyq, eńbekqorlyq qundylyqtaryn dáripteitin tárbielik mánine toqtaldy.
"Ulystyń uly kúni – tazalyq merekesi. Halqymyz osy kúni tal egip, bulaqtyń kózin ashqan. Ainalasyn tazalap, tabiǵatty aialaǵan. Bul dástúr búgin de óz jalǵasyn tabýda. Byltyrdan beri elimizde «Taza Qazaqstan» aktsiiasy júrip jatyr. Jalpyulttyq iske barsha jurtymyz, ásirese, jastar belsendi atsalysýda. Osylaisha qoǵamymyzda jańa ekologiialyq mádeniet pen bolmys qalyptasyp keledi. Naýryz – naǵyz eńbek merekesi. Kóktemniń basy – dala eńbegi jandanatyn kezeń. Qazir aýyl sharýashylyǵynda qarqyndy jumys bastaldy. Biz osy jyldy «Jumysshy mamandyqtary jyly» dep jariialadyq. Basty maqsatymyz – eńbek adamynyń bedelin arttyrý. Óitkeni eńbekqorlyq – ozyq oily ultqa tán qasiet", – dedi Memleket basshysy.
Foto: Aqorda
Prezident búkil álemniń almaǵaiyp jaǵdaida ómir súrip jatqan shaǵynda qoǵamnyń turaqtylyǵyn nyǵaitý saiasatymyzdyń basty baǵyty bolyp qala beretinin aitty.
"Biyl Konstitýtsiiamyzǵa jáne Qazaqstan halqy Assambleiasyna 30 jyl tolady. Sondai-aq Uly Jeńistiń 80 jyldyǵyn atap ótemiz. Kóp uzamai qasterli Táýelsizdigimizdiń 40 jyldyq mereili belesine jetemiz. Qazaqstan osy ýaqytta ozyq, órkenietti, qýatty memleket bolýy kerek. Men Ulttyq quryltaidyń Býrabaidaǵy jiynynda osy máselege arnaiy toqtaldym. Biz elimizdi jańa jahandyq jaǵdaiǵa beiimdeýimiz qajet. Memleketimizdiń baǵdary da, basymdyǵy da – aiqyn. Tsifrlandyrý isi men jasandy intellekt, iri infraqurylymdyq jobalar, kólik tasymaly jáne energetika, agroónerkásip kesheni, sondai-aq adam kapitaly – osynyń bári elimizdiń negizgi damý baǵyttary. Qazaqstan osy salalar boiynsha álemdik básekege qabiletti el bolmaq. Buǵan bizdiń múmkindigimiz tolyq jetedi. Biz «Zań men tártip» qaǵidasy berik ornyqqan, ádiletti, qaýipsiz, taza, mádenietti jáne damyǵan Qazaqstandy mindetti túrde birge quramyz! Qazaqstannan basqa elimiz joq. Sondyqtan bárimiz bir qoǵam bolyp memleketimizdi nyǵaitaiyq, damytaiyq, kórkeiteiik!" – dedi Qasym-Jomart Toqaev.
Budan keiin Memleket basshysy jurtshylyqpen birge merekelik kontsertti tamashalady.
Foto: Aqorda
