Qymbatty otandastar!
Respýblika kúni qutty bolsyn!
Qazaqstan osydan 35 jyl buryn Egemendik deklaratsiiasyn qabyldap, jańa dáýirge qadam basty. Tarihi qujatta halqymyzdyń óz bolashaǵyn derbes aiqyndaý quqyǵy naqty kórinis tapty. Sol arqyly bostandyqtyń bairaǵyn kóterip, zamanaýi memleket qurýymyzǵa jol ashyldy.
Sodan beri elimiz qiyn da kúrdeli joldan ótti. Biz Táýelsizdigimizdiń saiasi-ekonomikalyq tuǵyryn bekittik, shekaramyzdy aiqyndap, ony búkil álemge tanyttyq, jańa astanamyzdy saldyq. Sondai-aq jalpyulttyq biregeiligimizdi nyǵaitý, azamattarymyzdyń ál-aýqatyn arttyrý jolynda zor jetistikke qol jetkizdik. Qazaqstan saliqaly ári syndarly syrtqy saiasatynyń arqasynda óziniń ulttyq múddesine adal, halyqaralyq abyroi-bedeli joǵary memleket retinde qalyptasty.
Degenmen aldymyzda budan da zor mindetter tur. Biz qazirgi almaǵaiyp zamandaǵy orasan syn-qaterlerge qaramastan, barlyq azamatqa birdei múmkindik beretin Ádiletti Qazaqstandy quryp jatyrmyz. Saiasattaǵy, ekonomika men áleýmettik saladaǵy reformalar Otanymyzdyń ósip-órkendeýin qamtamasyz etip, halqymyzdyń turmys sapasyn arttyrýdy kózdeidi.
Biz «Zań jáne tártip» qaǵidatyn, «Taza Qazaqstan» ideologiiasyn, otanshyldyq pen tileýlestik, eńbekqorlyq pen jaýapkershilik, bilimpazdyq pen kásibilik qundylyqtaryn qoǵamda barynsha ornyqtyryp, keleshegine senimmen qaraityn ozyq oily ult retinde qalyptasyp kelemiz.
Ár býynnyń óz missiiasy bar. Osy oraida, babalar ósietin umytpai, qasterli Táýelsizdigimizdi nyǵaita túsý, Qazaqstandy damyǵan, jasampaz ári ádiletti el etý – bárimizge ortaq paryz.
Biz eseli eńbektiń, ózara qoldaýdyń jáne eń bastysy, myzǵymas birliktiń arqasynda barlyq josparymyzdy tabysty júzege asyryp, jańa belesterdi baǵyndyra beretinimizge senimdimin.
Elimizdiń keleshegi – árqaisymyzdyń qolymyzda.
Qazaqstannyń kók týy árdaiym biikte jelbiresin!
Barshańyzǵa zor densaýlyq, baq-bereke jáne mol tabys tileimin!
