Foto: Aqorda
Aqordada elimizge resmi saparmen kelgen Iordaniia Koroli II Abdalla ben ál-Hýseindi saltanatty qarsy alý rásimi ótti, dep habarlaidy Ult.kz.
Qasym-Jomart Toqaev pen II Abdalla bir-birine delegatsiia múshelerin tanystyrdy. Sodan soń Qurmet qaraýyly rotasynyń bastyǵy raport berip, eki eldiń memlekettik ánurandary oryndaldy. Budan keiin memleketter basshylary kelissóz ótetin zalǵa bardy.
Qazaqstan Prezidenti Astanaǵa shaqyrýyn qabyl alǵany úshin Korolge alǵys aityp, jyl basynda Ammanǵa jasaǵan saparyn yqylaspen eske aldy.
"Uly Mártebeli, Qazaqstanǵa qosh keldińiz! Sizdiń resmi saparyńyz biz úshin zor mártebe. Bul Sizdiń elimizge alǵashqy kelýińiz emes. Qazaqstannyń qazirgi órkendeý jolyna jiti nazar bólip otyrasyz. Ekijaqty kún tártibinde júzege asyrylýǵa tiis birqatar másele bar. Keshe eki el arasyndaǵy qarym-qatynastarǵa, sondai-aq halyqaralyq kún tártibine qatysty mazmundy áńgime órbittik. Sizdiń jahandaǵy jaǵdaidy jetik túsinetinińizge óte rizamyn. Búgin de pikir almasýdy jalǵastyrýǵa múmkindigimiz mol. Iordaniia men Qazaqstan arasyndaǵy ekijaqty yntymaqtastyq tabysty damyp keledi. Degenmen tiisti deńgeide talqylaýdy qajet etetin máseleler de joq emes", – dedi Prezident.
II Abdalla ekijaqty qarym-qatynasty odan ári nyǵaitýdyń mańyzyn atap ótip, saýda-ekonomikalyq yntymaqtastyqty arttyrýǵa daiyn ekenin rastady.
"Joǵary Mártebeli, qymbatty baýyrym, jyly sózińizge jáne qurmet kórsetip qabyldaǵanyńyzǵa alǵys aitamyn. Bul sapar Sizdiń osydan birneshe ai buryn meniń elime jasaǵan tabysty saparyńyzdyń jalǵasy ispetti. Qazaqstan maǵan óte jaqyn. Munda kelgen saiyn Sizdiń basshylyǵyńyzben elińiz júieli túrde ósip-órkendep kele jatqanyna kýá bolyp, tańǵalamyn. Ózińiz atap ótkendei, keshe eki el arasyndaǵy yntymaqtastyqty túrli salada damytý boiynsha pikir almastyq. Meniń búgingi saparym Qazaqstan men Iordaniia arasyndaǵy berik dostyqqa qurylǵan tarihtyń jańa paraǵyn ashatynyna senimdimin", – dedi Iordaniia Koroli.
