Foto: Aqorda
Dástúrli jiynǵa 2 myńnan astam adam, sonyń ishinde aýyl sharýashylyǵy ónimin óndirýshiler, salalyq qaýymdastyqtar men halyqaralyq uiymdar ókilderi, investorlar, ardagerler, sondai-aq agrarlyq sala mamandyqtarynda oqyp jatqan stýdentter jinaldy, dep habarlaidy Ult.kz.
Qasym-Jomart Toqaev aýyl sharýashylyǵy eńbekkerlerine rizashylyǵyn bildirdi.
«Eń aldymen, barsha aýyl sharýashylyǵy eńbekkerlerine kásibi merekelerińiz qutty bolsyn deimin. Bul shyn máninde, naǵyz eńbek adamdarynyń meiramy ekeni sózsiz. Diqandar, mal sharýashylyǵy mamandary, sharýalar – bári de elimizdiń ósip-órkendeýine zor úles qosýda. Qajyrly eńbekterińiz úshin Sizderge shynaiy rizashylyǵymdy bildiremin. Aýyl sharýashylyǵy – ekonomikamyzdyń strategiialyq máni airyqsha salasy.
Búgin, mine, aýyl sharýashylyǵyna arnalǵan ekinshi forýmdy ótkizip jatyrmyz. Alqaly jiynǵa aýyl-aimaqtardan kóptegen bilikti mamandar arnaiy kelip, qatysyp otyr. Sondyqtan búgingi forýmdy jalpyulttyq aýqymdaǵy basqosý deýge bolady. Jańa sóz sóilegen azamattar salmaqty oilaryn aitty, usynystardy muqiiat qarap, mindetti túrde eskerý qajet», - dedi ol.
Memleket basshysy biyl diqandarymyz 27 million tonna astyq jinaǵanyn atap ótti.
«Aýyl sharýashylyǵy árdaiym memleket nazarynda. Prezident retinde men osy salanyń qarqyndy damýyna erekshe mán beremin.
Halqymyz «Egin ekse – el toq» dep beker aitpaǵan. Byltyr biz mol astyq alyp, sońǵy on jyldaǵy rekordtyq kórsetkishke qol jetkizdik.
Biyl da kúzgi jiyn-terin berekeli boldy. Diqandarymyz 27 million tonna astyq jinady. Ár aimaq el qambasyna mol úles qosty. Sonyń ishinde Aqmola oblysy eń joǵary kórsetkishke (7,5 million tonna) ie boldy. Qyrkúiek aiynda egin oraǵynyń barysyn kórý úshin oblysqa arnaiy barǵanymdy bilesizder», - dep atty Prezident.
Sondai-aq sońǵy on jylda aýyl sharýashylyǵynyń jalpy ónimi 2,5 eseden astam óskenin aitty.
«Qazir halqymyzdyń 37 paiyzy, iaǵni 7,5 million adam aýylda turady. Aýyl – halqymyzdyń tamyry, rýhani qazyǵy. Buryn solai bolǵan, bolashaqta da solai bolyp qala bermek.
Túptep kelgende, aýyl sharýashylyǵyn damytý máselesine jalpy aýyl-aimaqtardy, iaǵni búkil eldi damytý dep qaraǵan jón. Osy baǵytta biz sońǵy jyldary aýqymdy reformalar júrgizip jatyrmyz.
Elimizdiń negizgi kórsetkishteri turaqty. Biylǵy on aida ekonomikamyz 6,4 paiyzǵa ósti.
Sonyń ishinde aýyl sharýashylyǵy da qarqyndy damýda. Jyl basynan beri osy saladaǵy negizgi kapitalǵa salynǵan investitsiia 20 paiyzdan astam ósip, 790 milliard teńgege jetti.
Al eńbek ónimdiligi úsh jylda 37,3 paiyzǵa artty. Qazaqstan jahandyq azyq-túlik qaýipsizdigi reitingi boiynsha (Global Food Security Index) 32-shi orynda tur. Bul – jaqsy kórsetkish. Biraq bul máz bolyp, qol qýsyryp otyrýǵa bolady degen sóz emes.
Sebebi ashyǵyn aitýymyz kerek, biz aýyl sharýashylyǵynyń orasan zor áleýetin áli de tolyq qoldanbai otyrmyz. Elimiz jaiylymdyq jer aýmaǵy boiynsha álemde 6-shy oryn alady. Al egis alqaby boiynsha 8-shi orynda tur. Demek qolymyzda qajetti resýrs bar, tek sony tiimdi paidalanýymyz qajet.
Sońǵy on jylda aýyl sharýashylyǵynyń jalpy ónimi 2,5 eseden astam ósti, iaǵni 3,3 trillion teńgeden 8,3 trillion teńgege deiin kóbeidi. 2030 jylǵa deiin bul kórsetkishti taǵy 2 ese arttyrýymyz kerek. Bul – bizdiń qolymyzdan keletin sharýa.
Ulttyq damý josparymyz bar, maqsat-mindetterimiz de – aiqyn. Bizge keregi – sapaly jumys pen naqty nátije. Sol sebepti aldymen aýyl sharýashylyǵyn damytý úshin erekshe nazar aýdaratyn ózekti máselelerge toqtalyp ótkim keledi», - dedi ol.
