Memleket basshysy Mańǵystaý oblysyna jumys sapary barysynda Aqtaý qalasyndaǵy «Kaspii» sý tushytý zaýytynyń jumysymen tanysty, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke zaýytty keńeitý jobasynyń oryndalý barysy týraly baiandaldy. Táýligine 20 myń tekshe metr taza sý óndiretin zaýyttyń qýatyn eki esege deiin arttyrý jumystary júrgizilip jatyr.
Oblys basshylyǵynyń aitýynsha, qazirdiń ózinde Munaily aýdanynyń eldi mekenderi men Qaraqiia aýdanyna qarasty Quryq aýylynda sý tapshylyǵy qatty sezilip otyr. Óńirde halyq sanynyń artýyna jáne týristik klasterdiń damýyna bailanysty «Kaspii» sý tushytý zaýytynyń ónimdiligin táýligine 40 myń tekshe metrge deiin arttyrý qajettigi týyndaǵan.
Qasym-Jomart Toqaev óńirdi aýyzsýmen qamtamasyz etetin kásiporynnyń mańyzy zor ekenin atap ótip, zaýytty jańǵyrtý jumysy sapaly oryndalatynyna senim bildirdi.
– Bul – óte qajetti, kerek joba. Men búgingi jiynda naqty máselelerdi aittym. Mundai jobalarsyz qiyn bolady. Izrail, Saýd Arabiiasy, Singapýr siiaqty taza aýyzsýy joq elder kóp. Sondyqtan biz de mindetti túrde ozyq tehnologiialardy engizýimiz qajet. Úkimetke tapsyrma berildi. Kaspiidiń de deńgeii túsip barady. Muny da oilanýymyz kerek, – dedi Prezident.
Budan keiin Memleket basshysy zaýyt jumysshylarymen áńgimelesip, olardyń halyq úshin paidaly is atqaryp jatqanyn atap ótti.
