Aqorda rezidentsiiasynda Prezident Qasym-Jomart Toqaevtyń tóraǵalyǵymen qarjy-ekonomika salasyndaǵy meilinshe ózekti máseleler jóninde keńes ótti, dep habarlaidy Aqordanyń baspasóz qyzmeti.
Memleket basshysy álemdegi geosaiasi jaǵdaidyń qubylmaly bolýy bizdiń ekonomikamyzǵa aitarlyqtai áser etkenin atap ótip, memlekettik organdardyń úilesimdi ári tiimdi jumys isteýi qajet ekenin aitty.
– Jaǵdai kún saiyn ózgerýde, óte qubylmaly kezeń. Sondyqtan biz barlyq syn-qater men múmkindikti naqty ári tez anyqtap, ár qadamymyzdy nyq basýymyz kerek. Qabyldanatyn sheshimder barynsha salmaqty bolǵany jón. Biraq, sozbalańǵa salmai, shuǵyl sharalardy qolǵa alýymyz kerek. Qaǵazbastylyqqa jol bermeý qajet, – dedi Qasym-Jomart Toqaev.
Jiyn barysynda Premer-Ministr Álihan Smaiylov ekonomikanyń qazirgi jaǵdaiy men onyń damýyna qatysty boljamdar týraly baiandady. Ulttyq bank tóraǵasy Ǵalymjan Pirmatov qazirgi ýaqytta júrgizilip jatqan aqsha-kredit saiasaty jóninde esep berdi. Premer-Ministrdiń orynbasary – Qarjy ministri Erulan Jamaýbaev 2022 jylǵa arnalǵan respýblikalyq biýdjettiń naqty parametrleri jaiynda málimet berdi.
Sonymen qatar is-sharada biýdjet shyǵyndaryn ońtailandyrý, kóktemgi egis naýqanyna daiyndyq barysy, eksport saiasatyn damytý, investitsiia tartý jáne kólik logistikasyn jetildirý, sondai-aq Halyqtyń tabysyn arttyrý baǵdarlamasyn júzege asyrý máseleleri talqylandy.
Keńes qorytyndysy boiynsha Memleket basshysy Úkimet pen Prezident Ákimshiligine elimizdiń áleýmettik-ekonomikalyq damý máselelerine qatysty birqatar tapsyrma berdi.
