Memleket basshysy Qaraǵandy oblysynyń ákimi Jeńis Qasymbekti qabyldady, dep habarlaidy "Ult aqparat" Aqordaǵa silteme jasap.
Qazaqstan Prezidentine óńirdiń negizgi áleýmettik-ekonomikalyq kórsetkishteri, sonyń ishinde ónerkásip, aýyl sharýashylyǵy jáne qurylys salalaryndaǵy óndiristiń ósimi jóninde esep berildi.
Qasym-Jomart Toqaev oblystaǵy turǵyn úi qurylysynyń qarqynyn arttyrý, sonyń ishinde kópbalaly otbasylardy baspanamen qamtamasyz etý qajettigine nazar aýdardy.
Memleket basshysy ataýly áleýmettik kómekti belgili bir sanattaǵy azamattarǵa berýdiń, sondai-aq, ataýly áleýmettik kómek alatyn eńbekke jaramdy adamdardy jumyspen qamtýdyń mańyzdylyǵyn atap ótti.
Jeńis Qasymbek týristik klaster qalyptastyrýdyń perspektivalary jáne Ulytaý aýdanynda qajetti jol infraqurylymy, sondai-aq, Balqash kóli aimaǵy men Qarqaraly aýdanynda týrizm salasyn jańǵyrtý týraly baiandady.
Prezident Qaraǵandy oblysyndaǵy kóktemgi sý tasqyny jaǵdaiyn muqiiat baqylaýǵa alyp, tótenshe jaǵdaidyń aldyn alý úshin qajetti daiyndyq sharalaryn júrgizýdi tapsyrdy.
