Qasym-Jomart Toqaev qaýipsizdik jónindegi 56-shy Miýnhen konferentsiiasy aiasynda Kanadanyń Premer-Ministri Djastin Triýdomen kezdesip, kelissóz júrgizdi, dep habarlaidy "Ult aqparat" Aqordaǵa silteme jasap.
Taraptar Qazaqstan men Kanada arasyndaǵy saýda-ekonomikalyq, investitsiialyq jáne mádeni-gýmanitarlyq yntymaqtastyqtyń qazirgi ahýaly men perspektivalaryn talqylap, halyqaralyq uiymdar aiasyndaǵy yqpaldastyqty qarastyrdy, sondai-aq, halyqaralyq kún tártibindegi ózekti máseleler boiynsha pikir almasty.
Qasym-Jomart Toqaev Djastin Triýdoǵa iltipat bildirip, ekonomika, investitsiia tartý, aýyl sharýashylyǵy jáne tehnologiia salalaryndaǵy ekijaqty qatynastardy odan ári damytýdyń mańyzdylyǵyn atap ótti.
– Biz Kanadamen tyǵyz qarym-qatynas ornattyq. Yntymaqtastyǵymyzdyń qazirgi deńgeiin joǵary baǵalaimyz. Elderimiz arasyndaǵy ózara yqpaldastyqtyń aiasyn odan ári keńeite túsemiz dep úmittenemiz, – dedi Qazaqstan Prezidenti.
Memleket basshysy ýran salasyndaǵy kanadalyq «Cameco» kompaniiasynyń jumysyna oń baǵa berip, Kanada biznesine qajetti barlyq jaǵdaidy jasaýdy jalǵastyra berýge daiyn ekenin rastady.
Djastin Triýdo kezdesýge múmkindik týǵyzǵany úshin Qazaqstan Prezidentine alǵys bildirip, eki memleket arasyndaǵy kópjyldyq dostyq pen seriktestikke toqtaldy.
– Eki el arasyndaǵy ekonomikalyq yntymaqtastyqta kóptegen ortaqtyq bar. Biz energetika salasyndaǵy birqatar joba boiynsha yqpaldastyq ornattyq. Kooperatsiialarymyzdy odan ári nyǵaitýǵa niettimiz, – dedi Kanadanyń Premer-Ministri.
Kanada úkimetiniń basshysy saiasi jáne ekonomikalyq reformalardy júzege asyrý jónindegi Qazaqstan Prezidentiniń kúsh-jigerin joǵary baǵalap, azamattyq qoǵam men demokratiiany damytý salasyna qoldaý kórsetýge daiyn ekenin jetkizdi.
Kezdesý sońynda Qasym-Jomart Toqaev pen Djastin Triýdo bir-birin ózara sapar almasýǵa shaqyrdy.
