Memleket basshysynyń Ókimimen 13 shilde jalpyulttyq aza tutý kúni bolyp belgilengen bolatyn. Osyǵan orai túngi saǵat 00:00-den bastap elimizdegi barlyq Memlekettik Tý tómen túsirildi, dep habarlaidy Aqordanyń resmi saity.
Al búgin Nur-Sultan qalasynyń ýaqytymen saǵat 12:00-de respýblika boiynsha koronavirýs pandemiiasynyń qurbandaryn bir minýt únsizdikpen eske alý jariialandy.
Aqorda rezidentsiiasynyń aldynda Memleket basshysy Qasym-Jomart Toqaev koronavirýs indetinen qaza tapqan azamattardy qurmetpen bir minýt eske aldy.
Eske alý rásimine QR Parlamenti Senatynyń Tóraǵasy Máýlen Áshimbaev, Májilis Tóraǵasy Nurlan Nyǵmatýlin, QR Memlekettik hatshysy Qyrymbek Kósherbaev, QR Prezidenti Ákimshiliginiń basshysy Erlan Qoshanov, Qaýipsizdik Keńesiniń hatshysy Áset Isekeshev, Prezident Keńsesiniń bastyǵy Nurlan Onjanov, Densaýlyq saqtaý ministri Aleksei Tsoi qatysty.
Indet qurbandaryn únsiz eske alý rásimi respýblikanyń barlyq aimaǵynda ótti. Qurbandarǵa taǵzym sharasyn respýblikalyq arnalar tikelei efir arqyly kórsetti.
Aita keteiik, elimizde qalyptasqan ahýalǵa bailanysty halyqqa úndeý jasaǵan QR Prezidenti Qasym-Jomart Toqaev 13 shilde– Ulttyq aza tutý kúni dep jariialaitynyn málim etken bolatyn.
Tiisti ókimge Memleket basshysy 9 shilde kúni qol qoidy.
