Memleket basshysy Berlinge sapary barysynda nemis biznesiniń birqatar ókilderimen kezdesti, dep habarlaidy "Ult aqparat" Aqordaǵa silteme jasap.
«CLAAS Group» kompaniiasy Baqylaý keńesiniń tóraǵasy Katrina Klaas-Miýlhoizermen kezdesý barysynda birlesken investitsiialyq jobalardy júzege asyrý máseleleri talqylandy. «CLAAS Group» kompaniiasy bizdiń elimizge «CT Agro» distribiýtorlyq jelisi arqyly aýyl sharýashylyǵy tehnikalaryn ákelip, servistik qyzmet kórsetýmen ainalysady.
– Bizdiń negizgi strategiiamyz – elimizge tartylatyn investitsiialardy ártaraptandyrý. Investitsiia turǵysynan Germaniianyń negizgi strategiialyq seriktesi bolǵymyz keledi, – dedi Qasym-Jomart Toqaev.
Katrina Klaas-Miýlhoizer Qazaqstannyń iri kompaniialarmen ǵana emes, sondai-aq, orta deńgeidegi kompaniialarmen de yntymaqtastyq ornatýǵa nietti ekenine rizashylyq bildirdi.
«Linde AG» kompaniiasynyń atqarýshy vitse-prezidenti Kristian Brýhpen kezdesý barysynda kásiporynnyń Qazaqstanda júzege asyryp jatqan investitsiialyq jobalary men aldaǵy josparlary týraly sóz boldy.
– Kantsler Angela Merkelmen jáne Prezident Frank-Valter Shtainmaiermen júrgizilgen búgingi kelissózder joǵary deńgeide ótti. Osy kelissózder ekijaqty yntymaqtastyqty damytýǵa tyń serpin beretinine senimdimin, – dedi Memleket basshysy.
Kristian Brýh óz kompaniiasynyń 2013 jyly «Arselor Mittal Temirtaý» AQ bazasynda tehnikalyq gaz óndirý jobasyn iske asyrǵanyn atap ótip, oǵan 95 million evro kóleminde investitsiia salǵanyna toqtaldy.
– Búginde «Linde AG» kompaniiasy jobanyń ekinshi kezeńin qolǵa aldy. Jańa jobaǵa shamamen 80 million eýro investitsiia salýǵa niettimiz, – dedi Kristian Brýh.
Sonymen qatar germaniialyq kompaniia «QazMunaiGaz» UK» AQ Mańǵystaý oblysynyń Jańaózen qalasynda gaz óńdeý zaýytyn salý jóninde kelissózder júrgizip jatqanyn aitty.
Qazaqstan Prezidenti «Schaeffler Group» kompaniiasynyń Bas direktory Klaýs Rozenfeldpen kezdesý kezinde ózara yntymaqtastyqtyń perspektivalaryn talqylady. Avtomobil jasaý, ónerkásip jáne ǵarysh salalary boiynsha qosalqy bólshekter shyǵaratyn kásiporyn basshysy Klaýs Rozenfeld Qasym-Jomart Toqaevqa óndiristik jáne investitsiialyq múmkindikteri týraly málimet berdi.
«Siemens Healthineers» kompaniiasynyń Bas direktory Bernd Montag Memleket basshysyna memlekettik-jekemenshik áriptestik negizinde salynatyn onkologiialyq ortalyqtyń jobasyn usyndy. Kásiporyn basshysy elimizdiń óndiristik áleýetin arttyrýǵa septigin tigizetin uzaq merzimdi yntymaqtastyq ornatýǵa nietti ekenin aitty.
