Búgin Mədeniet jəne sport ministri Aqtoty Raiymqulova tanymal ənshi Dimash Qudaibergendi qabyldap, týǵan kúnine orai Memleket basshysy Qasym-Jomart Toqaevtyń quttyqtaý hatyn tabystady, dep habarlaidy "Ult aqparat" vedomstvonyń baspasóz qyzmetine silteme jasap.
«Qurmetti Dimash!
Jas kezińnen óner jolyn tańdap, úzdiksiz eńbektiń nətijesinde úlken belesterdi baǵyndyra bildiń. Aldymen respýblikalyq, keiin halyqaralyq baiqaýlarda dara shyqtyń. Ən arqyly ulttyq qundylyqtarymyzdy dəriptep, qazaqtyń tilin, qońyr dombyrasyn, izgi dəstúrlerin əlemge tanytyp kelesiń.
Aldaǵy ýaqytta elimizdiń rýhani-mədeni salasyn órkendetýge mol úles qosyp, bilimiń men kəsibi biliktiligińdi jetildire beretinińe senim artamyn. Ózińe densaýlyq, jańa tabystar tileimin!», - dep jazylǵan Memleket basshysynyń quttyqtaý hatynda.
Osydan keiin Aqtoty Raiymqulova týǵan kún iesin óz atynan quttyqtap, shyǵarmashylyq tabys tiledi.
«Siz Uly dala eli ónerin ǵalamdyq deńgeide tanytyp kele jatqan ónerpaz retinde halyqtyń ystyq yqylasy men qurmetine bólenip jatyrsyz. Týǵan jerdiń topyraǵymen daryǵan daryn men talǵamnyń, tabandy izdenis pen qajyrly eńbektiń arqasynda jahan halyqtary súiip tyńdaityn ənshige ainaldyńyz. Siz baǵyndyrǵan biik belester men tolaǵai tabys izińizden ergen jastar úshin úlgili súrleý.
Aldaǵy ýaqytta da júrek qylyn shertetin týyndylaryńyzdyń qatary kóbeiip, ónersúier qaýymdy qýanta berýińizge tilektespin», - dedi ministr.
