Elektrondy formattyń qarqyndy damyp jatqanyna qaramastan dástúrli kitaphananyń aǵartýshylyq róli eshqashan mánin joǵaltpaidy. Bul týraly Ulttyq qoǵamdyq senim keńesiniń 4-otyrysynda Memleket basshysy Qasym-Jomart Toqaev aitty, dep habarlaidy QazAqparat.
«Jaqynda áleýmettik jelide elimizdegi kitaphanalardyń róli týraly qoǵam nazaryn aýdartqan pikirtalas boldy. Shyndyǵyna kelgende bul máseleniń mán-jaiy barshaǵa túsinikti bolýǵa tiis. Búgingi zamanda kitapsyz, sondai-aq kitaphanasyz adamnyń oidaǵydai damýy múmkin emes. Búkil álemdegi kitaphanalar - bilim men mádeniettiń oshaǵy, jańa oilar men tyń pikirlerdiń mekeni. Elektrondy formattyń qarqyndy damyp jatqanyna qaramastan dástúri kitaphananyń aǵartýshylyq róli eshqashan mánin joǵaltpaidy», - dedi Memleket basshysy.
Sondyqtan da Qazaqstan Prezidenti jalpy kitaphanalardyń júiesi men jumysyn uiymdastyrýǵa jańasha kózqaraspen qaraý qajettigin basa aitty.
«Bul rette osy saladaǵy zamanaýi úrdisterdi eskergenimiz jón. Mysaly, men Almaty qalasyndaǵy kitaphanalardy jańǵyrtýǵa arnalǵan osyndai utymdy jobalar bar ekenin bilemin. Jaqynda keńes múshesi Raýan Kenjehanuly da maǵan aýyl mektepterin jáne kitaphanalardy jańǵyrtý jónindegi jobasyn kórsetti»,- dedi Qasym-Jomart Toqaev.
