Memleket basshysy Qasym-Jomart Toqaev Shyǵys Qazaqstan oblysynyń ákimi Danial Ahmetovti qabyldady, dep habarlaidy Aqorda.
Qasym-Jomart Toqaevqa óńirdiń biylǵy on ai ishindegi áleýmettik-ekonomikalyq damýy jóninde esep berildi.
Oblys ákiminiń aitýynsha, halyqqa vaktsina salý jumystary qarqyndy júrgizilip jatyr. Atap aitqanda, vaktsina alýǵa tiisti turǵyndardyń 100 paiyzy ekpeniń birinshi komponentin alǵan, al ekinshi komponentin 7 jeltoqsanǵa deiin salý josparlanǵan.
Kezdesý barysynda oblystyń aýyl sharýashylyǵy salasyn damytý máseleleri talqylandy. Danial Ahmetovtiń málimeti boiynsha 2022 jylǵa qarai aýyl sharýashylyǵy ónimderiniń eksportyn 4 ese arttyrý kózdelgen.
Prezidentke jaqynda ashylǵan «Úlbi-TVS» zaýytynyń jumysy týraly baiandaldy. Kásiporynda jylý energiiasyn alýǵa arnalǵan injenerlik qurylymdar shyǵarylady jáne 140 jańa jumys orny ashylady. Zaýytta jylyna 200 tonna ýran otyny óndiriledi.
Memleket basshysy oblys ákimine jylytý maýsymy kezinde qazandyqtardyń úzdiksiz jumys isteýin qadaǵalaý, turǵyndardy kómirmen qamtamasyz etý, sondai-aq aýyl sharýashylyǵy ónimderiniń eksportyn arttyrý jumystaryn jalǵastyrý jóninde tapsyrma berdi.
