Memleket basshysy Qasym-Jomart Toqaev belgili jýrnalist, «Jetisý» telearnasynyń direktory Beisen Quranbektiń qaitys bolýyna bailanysty onyń otbasy men jaqyn týystaryna kóńil aityp, jedelhat joldady. Bul týraly QR Prezidentiniń baspasóz hatshysy Berik Ýáli jelidegi paraqshasynda jazdy.
«Belgili jýrnalist, tanymal telejúrgizýshi Beisen Quranbektiń dúnieden ótýine bailanysty aýyr qaiǵylaryńyzǵa ortaqtasyp, kóńil aitamyn. Beisen Quranbek qazaq jýrnalistikasynda ózindik orny bar, kásibi qoltańbasyn qalyptastyrǵan azamat edi. «Qazaqstan» ulttyq telearnasyndaǵy «Aitýǵa ońai», «Qareket» baǵdarlamalaryn júrgizip, eldiń ystyq yqylasyna bólendi, halyqtyń alǵysyn aldy. Ol Almaty oblystyq «Jetisý» arnasynyń direktory retinde bilikti basshy, utqyr uiymdastyrýshy ekenin de kórsete bildi. Marqumnyń topyraǵy torqa, jatqan jeri jaily, imany salamat bolsyn!», – delingen jedelhatta.
