Elbasy Qorǵanys jáne aeroǵarysh ónerkásibi ministri Beibit Atamqulovty qabyldady, - dep habarlaidy "Ult aqparat" Aqordaǵa silteme jasap.
Kezdesýde Memleket basshysy Qorǵanys jáne aeroǵarysh ónerkásibi ministrliginiń negizgi maqsaty ozyq ǵylymi-tehnikalyq jetistikter negizinde Qazaqstan áskeri úshin qarý-jaraq jasaý, aeroǵarysh qyzmetin damytý, kiberqaýipsizdikti qamtamasyz etý ekenine nazar aýdardy.
– Qazir bul ministrliktiń quzyrynda buǵan deiin túrli vedomstvonyń qaraýynda bolǵan salalar bar. Qorǵanys jáne aeroǵarysh ónerkásibi ministrligi ozyq innovatsiialyq ázirlemelerdi birinshi bolyp qoldanyp kele jatqan memlekettik organdardyń qatarynda, – dedi Nursultan Nazarbaev.
Qorǵanys jáne aeroǵarysh ónerkásibi ministri Qazaqstan Prezidentin atqarylǵan jumystardyń nátijeleri men osy saladaǵy ortamerzimdi perspektivadaǵy josparlar jóninde habardar etti.
– Ministrlik Sizdiń «Qazaqstannyń úshinshi jańǵyrýy: jahandyq básekege qabilettilik» atty joldaýyńyzdy josparly túrde iske asyryp keledi. Naqty nátijelerge qol jetkizdik. Sondai-aq, qorǵanys kesheni men ónimdi eksporttaý kásiporyndaryn tehnologiialyq jańǵyrtý jóninde jumystar qarqyndy júrgizilýde. Qazirgi ýaqytta memlekettik qorǵanys tapsyrysy ázirlenip, iske asyryla bastady, – dedi B.Atamqulov.
Kezdesý qorytyndysy boiynsha Memleket basshysy qorǵanys-ónerkásip kesheni men aeroǵarysh qyzmetin odan ári damytýǵa qatysty birqatar naqty tapsyrma berdi.
.jpeg)