Memleket basshysy Bas prokýror Qairat Qojamjarovty qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Nursultan Nazarbaevqa elimizdegi quqyq qorǵaý organdarynyń qyzmeti jáne buǵan deiin júktelgen tapsyrmalardyń oryndalýy jóninde esep berildi.
Elbasy prokýratýra organdaryna azamattar quqyqtarynyń, zańdy múddeleriniń saqtalýy jáne zańnamalardyń oryndalýy úshin joǵary qadaǵalaýdy júzege asyrý mindeti qoiylǵanyn aitty.
– Búginde elimizdegi zańdylyqty qamtamasyz etý úshin qajetti sharalardyń bári iske asyryldy. Atap aitqanda, quqyq qorǵaý organdary men sot júiesi reformalandy, tiisti zańdar qabyldandy, sonyń ishinde biznesti negizsiz tekseristerden qorǵaý týraly másele de qamtyldy. Solardy tek sapaly oryndaý qajet, – dedi Qazaqstan Prezidenti.
Nursultan Nazarbaev qylmystyq zańnamany izgilendirý jónindegi jumystardy jalǵastyrýdyń mańyzdylyǵyn atap ótip, Qazaqstandaǵy sottalǵandar sany 35 paiyzǵa azaiǵanyn aitty.
Bas prokýror Memleket basshysyna qylmystyq protsesti reformalaý baǵytynda atqarylyp jatqan jumystar jóninde málimdep, osy is-qimyldardyń nátijesinde elimizdegi jalpy qylmystyq ister ótken jylmen salystyrǵanda 10 paiyzǵa kemigenin atap ótti.
– Prokýratýra organdary tarapynan azamattardyń quqyqtary men zańdy múddelerin qorǵaý úshin júieli sharalar qabyldanýda. Biylǵy alty aidyń ishinde eńbek quqyqtarynyń saqtalýy, jer qatynastary, tariftik zańnama salalaryna tekserý júrgizildi, nátijesinde úsh millionnan asa azamattyń quqyqtary qorǵalyp, qaita qalpyna keltirildi, – dedi Qairat Qojamjarov.
Elbasy kezdesý qorytyndysy boiynsha birqatar naqty tapsyrma berdi.
