Memleket basshysy Qasym-Jomart Toqaev Tsifrlyq damý, innovatsiialar jáne aeroǵarysh ónerkásibi ministri Baǵdat Mýsindi qabyldady, dep habarlaidy Aqorda.
Qasym-Jomart Toqaevqa ministrliktiń 2020 jyldyń qorytyndysy boiynsha atqarǵan jumystary, tsifrlandyrýdyń damý perspektivalary, sondai-aq, internet bailanysyna, sonyń ishinde, Prezidenttiń halyqqa Joldaýyndaǵy aýyldyq jerlerde qol jetimdilikti arttyrýǵa baǵyttalǵan tapsyrmalarynyń oryndalý barysy týraly esep berildi.
Ministr Memleket basshysyna bailanys sapasynyń talaptary bekitilgeni jóninde baiandady. Endi 3G/4G jelileri úshin sapanyń tómengi shegi anyqtaldy. Buǵan deiin bailanys sapasynyń tómengi shegi reglamenttelmegen bolatyn.
Sonymen qatar radiotolqyndardy aýktsion formatynda anyqtaý jónindegi zańnamaǵa engiziletin ózgerister ázirlendi. Bul 5G jelisine kóshýde mańyzdy ról atqarady. Sondai-aq engiziletin ózgeristerge sáikes bailanys sapasynyń parametrlerin buzǵany úshin salynatyn aiyppul kólemi 1000 AEK bolmaq.
Prezidentke memlekettik qyzmet kórsetýdiń qol jetimdiligin qamtamasyz etý úshin qabyldanǵan sharalar týraly baiandaldy.
Ministr eGov mobile mobildi qosymshasyna biometriialyq sáikestendirý júiesin engizý jaiynda aitty. Bul halyqtyń memlekettik qyzmet kórsetý júiesine tirkelip, qyzmet alý ýaqytyn edáýir qysqartýǵa múmkindik beredi. Qasym-Jomart Toqaev atalǵan qosymsha arqyly memlekettik qyzmet kórsetý jumystaryn tezdetýdi tapsyrdy.
Prezidentke «Halyq únine qulaq asatyn memleket» tujyrymdamasyn júzege asyrý aiasynda qolǵa alynǵan e-aryz-shaǵymdar qyzmet júiesi tanystyryldy. Bul azamattardyń kompiýter túimesin birneshe márte basý arqyly ótinish-shaǵymdaryn berýine jáne jedel túrde memlekettik organdardan jaýap alýyna múmkindik beredi. Memleket basshysy osyndai qyzmettiń qurylýyna qoldaý bildirip, ony tiimdi engizýge tapsyrma berdi.
Sonymen qatar Baǵdat Mýsin Qasym-Jomart Toqaevqa «Azamattarǵa arnalǵan Úkimet» memlekettik korporatsiiasynyń jumysy, onyń ishinde, búkil elimiz boiynsha halyqqa qyzmet kórsetetin 115 ortalyqty jańǵyrtý jospary týraly aitty. Osyǵan bailanysty memlekettik korporatsiianyń kadrlyq áleýetin arttyrý máselesi óte mańyzdy bolmaq.
Qasym-Jomart Toqaevqa basshylyq qyzmetterge úmitkerlerdi, sonyń ishinde, Halyqqa qyzmet kórsetý ortalyqtarynyń jetekshilerin iriktegende prezidenttik jastar kadrlyq rezerviniń tájiribesin paidalanatyny jóninde málimet berildi. Memleket basshysy bul ideiany qoldap, irikteý úderisiniń barynsha ashyq bolýyn qamtamasyz etýdiń mańyzdylyǵyna nazar aýdardy. Bul jumystar Memlekettik qyzmet isteri agenttigimen birlese atqarylady.
Baǵdat Mýsin Qasym-Jomart Toqaevqa «Tsifrlyq Qazaqstan» ulttyq jobasynyń transformatsiialaný úderisi týraly baiandady. Onda memlekettiń azamattarmen ózara yqpaldastyǵyna, halyqtyń máselelerin sheshýge bailanysty barlyq tynys-tirshilikti esepke alýǵa basa mán beriledi.
Budan bólek ministr Memleket basshysyna qazaqstandyq «KazSat» bailanys seriginiń júiesin damytý jóninde baiandady. Atap aitqanda innovatsiialyq sheshimderdiń paidasy úshin, sonyń ishinde bailanys serikteriniń jańa túrleriniń shyǵýymen bailanysty «KazSat-2R» jobasyn toqtatý týraly sheshim qabyldandy. Bul biýdjettiń milliardtaǵan teńge qarjysyn únemdeýge múmkindik beredi.
