Azamattyq alǵan qandastarymyz soltústik óńirge kóshse Úkimet olardyń úi kezeginiń saqtalýyn qamtamasyz etýi kerek. Bul týraly Ulttyq qoǵamdyq senim keńesiniń 4-otyrysynda Memleket basshysy Qasym-Jomart Toqaev aitty, dep habarlaidy "Ult aqparat".
«Otanyna oralǵan qandastardy úimen qamtamasyz etý máselesi de tolyq sheshimin tapqan joq. Olardyń tek bir jylǵa beriletin qandas mártebesiniń merzimi bitkenshe ǵana úi alýǵa múmkindigi bar. Al azamattyqqa ie bolǵan soń bul mártebesi joiylyp, sonymen birge úi alý quqyǵynan da birden aiyrylady. Osyǵan orai azamattyq alǵan qandastarymyz soltústik óńirge kóshse, Úkimet olardyń úi kezeginiń saqtalýyn qamtamasyz etýi kerek. Bul shara qandastardyń osyndai jumys qoly tapshy aimaqtarǵa kóship barýyna qosymsha serpin beredi», - dedi Memleket basshysy.
QR Prezidentiniń atap ótýinshe, shetelde týyp-ósken qazaqtardyń barlyǵy tarihi otanyn maqtan tutady.
«Kóptegen qandasymyz atajurtqa oralyp jatyr. Olarǵa alǵashqy kezde memleket jan-jaqty qoldaý kórsetýge tiis»,- dedi Qasym-Jomart Toqaev.
