Memleket basshysy Aýǵanstan Prezidenti Ashraf Ǵanimen telefon arqyly sóilesti, dep habarlaidy Aqorda.
Aýǵan tarapynyń bastamasymen Qasym-Jomart Toqaev Ashraf Ǵanimen telefon arqyly sóilesti. Qazaqstan men Aýǵanstan basshylary ekijaqty yntymaqtastyqtyń qazirgi ahýaly men keleshek perspektivalaryn talqylady.
Aýǵanstan Prezidenti Qazaqstannyń aýǵan ishindegi dialogty turaqty túrde qoldap, elimizdiń keń kólemde ekonomikalyq kómek kórsetip kele jatqany úshin alǵys aitty.
Qasym-Jomart Toqaev elimizdiń Aýǵanstanǵa aldaǵy ýaqytta da jan-jaqty qoldaý kórsete beretinin rastady.
Memleket basshysynyń aitýynsha, Qazaqstan Aýǵanstannyń qaýipsizdigin qamtamasyz etý, ekonomikasy men áleýmettik infraqurylymyn qaita qalpyna keltirý jónindegi halyqaralyq jáne aimaqtyq forýmdardyń jumysyna belsendi túrde qatysady.
Qasym-Jomart Toqaev Aýǵanstanmen aradaǵy jan-jaqty bailanystardy jandandyrý maqsatynda erekshe tapsyrmalar boiynsha elshi dárejesindegi arnaiy ókil institýty qurylǵanyn atap ótti.
Osy jyldyń birinshi jartysynda Qazaqstanǵa úkimettik delegatsiia keledi.
Prezidentter osy kezdesý barysynda naqty máseleler men yntymaqtastyqtyń basqa da baǵyttary boiynsha dialogty odan ári jalǵastyrý jóninde ýaǵdalasty.
Qasym-Jomart Toqaev Ashraf Ǵanidi úkimettik delegatsiialar jasaityn kelissózderdiń nátijelerin bekitý jáne Qazaqstan men Aýǵanstan arasyndaǵy ózara is-qimyldyń keleshegin talqylaý úshin elimizge resmi saparmen kelýge shaqyrdy.
