Memleket basshysy «Atameken» ulttyq kásipkerler palatasynyń VII sezine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev óz sózinde «Atameken» ulttyq kásipkerler palatasy biznestiń quqyqtary men zańdy múddelerin tabysty qorǵap, kásipkerlikti qoldaý jónindegi memlekettik saiasatty júzege asyrýǵa belsendi qatysyp kele jatqanyn atap ótti. Prezidenttiń sózinshe, búgingi kúni kásipkerlik el ekonomikasynyń qozǵaýshy kúshine ainaldy deýge tolyq negiz bar.
– Sońǵy bes jyl ishinde shaǵyn jáne orta biznestiń el ekonomikasyndaǵy úlesi 24 paiyzdan 32 paiyzǵa artty. Kásipkerlik salasynda eńbek etetin azamattardyń sany 21 paiyzǵa, iaǵni 2,8 millionnan 3,4 millionǵa deiin ósti. Qazir jumyspen qamtylǵandardyń 40 paiyzǵa jýyǵy shaǵyn jáne orta bizneste eńbek etedi. Buǵan memleket pen biznesti bailanystyryp otyrǵan Ulttyq palatanyń sińirgen eńbegi mol, – dedi Memleket basshysy.
Qasym-Jomart Toqaev Úkimet pen «Atameken» UKP-nyń úilesimdi jumysy elimizdegi biznes ahýalǵa oń áser etip otyrǵanyn da atap ótti. Biyl qaita retteýdi jalǵastyrýdy, biznes úshin rásimderdi jeńildetýdi, memlekettik qyzmet kórsetý merzimderin qysqartýdy qarastyratyn zań shyǵarý bastamalarynyń segizinshi toptamasy qabyldandy.
– Meniń tapsyrmam boiynsha kásipkerlerdiń quqyqtaryn qorǵaý úshin «bizneske adaldyq prezýmptsiiasy» qaǵidaty zań júzinde bekitildi. Bul barsha daýly jáne túsiniksiz máselelerdi kásipkerlerdiń paidasyna sheshýge múmkindik beredi. Atalǵan zań shyǵarýdaǵy ózgerister tiisti sot tájiribesinde qoldaý tabatynyna senemin. Osy jyldyń 1 qańtarynan bastap meniń Jarlyǵyma sáikes shaǵyn jáne orta biznesti úsh jylǵa deiin tekserýden bosatý týraly moratorii kúshine endi. Nátijesinde mundai sýbektilerdi tekserý kólemi 8 ese qysqardy, – dedi Prezident.
Memleket basshysy Úkimet pen Qazaqstandaǵy biznestiń úilesimdi jumysynyń nátijesinde pandemiia kezinde densaýlyq saqtaý salasyndaǵy jáne ekonomikadaǵy jaǵdaidy baqylai alǵanymyzdy aitty. Shaǵyn jáne orta bizneske qoldaý kórsetý maqsatynda daǵdarysqa qarsy teńdessiz birqatar shara qabyldanyp, kásipkerliktiń 700-den astam sýbektisi salyq tóleýden bosatyldy nemese olar úshin salyq mólsherlemeleri tómendetildi. «Qarapaiym zattar ekonomikasy» baǵdarlamasy belsendi jumys istei bastady. Memlekettik jáne kvazimemlekettik uiymdardyń ǵimarattarynda ornalasqan shaǵyn jáne orta biznes sýbektileri jyl sońyna deiin jalǵa alý tólemderinen bosatyldy. Sondai-aq qatty zardap shekken sektorlar úshin biýdjetten tys barlyq qorlarǵa aýdarymdar jiberý toqtatyldy. Asa qatty zardap shekken shaǵyn jáne orta biznes sýbektileriniń nesieleri jylyna 6 paiyzǵa deiingi mólsherlememen sýbsidiialanady.
Qasym-Jomart Toqaev Úkimet pen Ulttyq bankke 2021 jylǵa arnalǵan «Jumyspen qamtýdyń jol kartasy» baǵdarlamasyn uzartýdy tapsyrdy. Bul rette, jańartylǵan baǵdarlamada birinshi kezeńdi iske asyrý barysynda anyqtalǵan kemshilikterdi eskerý qajet.
– Bul jerde óńirlerge bólinetin qarajattardy sapaly ári tiimdi bólý jóninde sóz bolyp otyr. Tikelei maǵynasynda aqshany jelge ushyrýǵa nemese «óz» kompaniialaryna kelisimsharttardy bólip berýge jol berilmeýi tiis. Qarajattardyń bir bóligin mikro nesie berýge jumsaýǵa bolady. Úkimet pen Ulttyq Bank 1 jeltoqsanǵa deiin naqty usynystar berýi tiis. Ulttyq palata daǵdarysqa qarsy sharalardy ázirleý men olardy iske asyrýda birshama qoldaý kórsetkenin atap ótkim keledi. Meditsina tilimen aitsaq, biz birlese otyryp problemaǵa durys diagnoz qoiyp, emdeýdiń qajetti sharalaryn qabyldai aldyq, – dedi Prezident.
Qasym-Jomart Toqaevtyń aitýynsha, pandemiia men daǵdarys Qazaqstannyń aldyna jańa mindetter qoiyp otyr. Sondyqtan memleket elimizde biznes júrgizýdiń sharttaryn júieli túrde jaqsartýdy jalǵastyra beredi. Prezidenttiń tapsyrmasy boiynsha sapaly jańa retteýshilik júie ázirlene bastady. Qoldanystaǵy barlyq baqylaý-qadaǵalaý, ruqsat berý jáne basqa da retteýshi quraldarǵa úlken ári naqty tekserýler jasalady.
– Biz quqyq qorǵaý jáne sot júielerin reformalaýdy bastadyq. Reforma jedel, ashyq jáne tiimdi bolýy tiis. Bul jumysty ózim tikelei qadaǵalaimyn. Mundai kúrdeli, jabyq júielerdi, onyń ishinde, biznestiń quqyqtary men múddelerin qorǵai otyryp ózgertý qajet. Sondyqtan «Atamekennen» naqty usynystar kútemin. Quqyq qorǵaý organdarynyń barsha qyzmetkerleri, inspektordan bastap generalǵa deiin elimizde qolaily biznes ahýaldy qalyptastyrý jumysynyń tolyqqandy qatysýshylary ekenderin sezinýleri tiis, – dedi Memleket basshysy.
Otandyq ónim kólemin ulǵaitý jáne qaita óńdeý ónerkásibin qoldaý máseleleri basty nazarda bola bermek. Úkimet satyp alýdy retteý jónindegi normativtik-quqyqtyq bazany ózektendirýdi bastady. Kvazimemlekettik sektordy satyp alý jobasy boiynsha joba júrip jatyr. Óńdeý óndirisine shikizat jetkizý tetikteri ázirlenýde. Otandyq ónerkásip sektory úshin jańa zańnamalyq baza daiyndalýda. Agroónerkásip keshenin damytý jónindegi ulttyq jobany ázirleý bastaldy.
– Qazir bizdiń ótkennen sabaq alatyn, aýyl sharýashylyǵynyń búgingi jaǵdaiyn jáne bolashaǵyn dálme-dál anyqtaityn, óz áleýetimizdi durys baǵalaityn múmkindigimiz bar. Aldymen pármendi sharalar men qoldaý institýttaryn aiqyndap, durys retteý ortasyn qalyptastyrý kerek. Sodan keiin ǵana qapysyz jáne basymdyqtardy jyl saiyn ózgertpei batyl alǵa jyljýǵa bolady. Agroónerkásip kesheni boiynsha baǵdarlamalyq qujattyń ázirlenýin tikelei qadaǵalap otyratyn bolamyn. Bul rette sheneýnikterdiń de, kásipkerlerdiń de, sarapshylardyń da pikirin tyńdaimyn. Óitkeni aýyl sharýashylyǵynyń áleýetin kóteretin kez jetti. Olai bolmaǵan jaǵdaida bizdiń ekonomikamyz úshin ókinishke uryndyratyn teris saldar oryn alýy múmkin, – dedi Prezident.
Qasym-Jomart Toqaev otandyq kompaniialardy belsendi túrde syrtqy naryqtarǵa shyǵýǵa shaqyrdy. Úkimetke Ulttyq kásipkerler palatasymen birlesip eksporttyq áleýeti bar salalar men kásiporyndardy anyqtaý tapsyrylǵan. Mundai jobalarǵa qarjylandyrý jeńildigi, eksporttyq qoldaý tetikteri, zattai grant berý sekildi keshendi qoldaý sharalary kórsetiledi. Qazaqstan keler jyly shikizattyq emes eksporttyń kólemin 29 milliard dollarǵa deiin arttyrýdy kózdep otyr.
Prezident baiandamasynda elimizdiń ekonomikasyn tsifrlandyrý qarqynyn saqtaýǵa bailanysty da erekshe kóńil bólindi.
– Jaqyn arada jerge qol jetkizý sekildi kásipkerler úshin taǵy da bir mańyzdy másele sheshilýi kerek. Meniń tapsyrmam boiynsha Úkimet jer qatynastaryn tsifrlandyrý jáne otandyq biznestiń aýyl sharýashylyǵyna arnalmaǵan jer resýrstaryna qol jetkizýin jeńildetý jóninde zań jobasyn daiyndady. Sondai-aq zańda jer qatynastary men sáýlet salasynda memlekettik qyzmetterdi elektrondy túrde kórsetý, jer ýchaskelerin berý merzimin 1 jyldan 20 kúnge deiin qysqartý, memlekettik aktini, jerge ornalastyrý jobasyn alyp tastaý jáne basqa da birqatar mańyzdy máseleler qarastyrylǵan. Úkimet jyl sońyna deiin atalǵan zań jobasyn Parlamentke berýi qajet, – dedi Memleket basshysy.
Qasym-Jomart Toqaev otandyq kásipkerlerdi qoldaý jáne qorǵaý el damýy úshin mańyzdy mindet ekenin aitty. Sonymen qatar bul Prezidenttiń sailaýaldy ýádeleri men basymdyqtarynyń biri. Sondyqtan ol ulttyq biznesti damytýǵa árqashan basa nazar aýdarady.
– Úkimet pen basqa da memlekettik organdar biznesti qoldaýǵa bailanysty mindetterdiń tiisinshe oryndalýyn qamtamasyz etetin bolady. Alaida biznes sektor da jańa talaptarǵa tez beiimdelýi kerek. Kásipkerler óz biznesin jańǵyrtýǵa nazar aýdarýǵa tiis. Bul, eń aldymen, básekege qabiletti bolý, árqashan jańa bastamalar men jańa jobalardy iske asyrýǵa umtylý degen sóz. Sonymen birge biz tabysty ádil bólýdiń mańyzdylyǵyn da umytpaýymyz kerek. Kásipkerlerge jumys oryndaryn ashyp, tabysyn ulǵaitýy qajet. Eń aldymen, bul memleketten qarjylai kómek alatyn kásiporyndardyń mindeti, – dedi Prezident.
Sóziniń sońynda Qasym-Jomart Toqaev birlesip jumys isteý arqyly ǵana el ekonomikasyn qalpyna keltirip, damýdyń jańa deńgeiine shyǵa alatynymyzdy atap ótti. Prezident «Atameken» ulttyq kásipkerler palatasy aldaǵy ýaqytta da búkil qazaqstandyq biznes-qoǵamdastyqtyń múddelerin bildiretin bedeldi qurylym bolyp qala beretinine senim bildirdi.
