Elordada Memleket basshysy Nursultan Nazarbaev «Beibitshilik qabyrǵasy» monýmentiniń ashylý saltanatyna qatysty. Monýment Astana qalasynyń 20 jyldyǵyna arnalǵan Aqtóbe oblysynyń tartýy bolyp otyr, dep habarlaidy QazAqparat tilshisi.
Saltanatty sharaǵa diplomatiialyq missiialardyń jetekshileri, kórnekti memleket jáne qoǵam qairatkerleri, Parlament depýtattary, ziialy qaýym ókilderi, Aqtóbe oblysynyń delegatsiiasy, sonyme birge Astanada ótip jatqan halyqaralyq Kelisimshart Uiymynyń qatysýshylary qatysty.
Aqtóbelikterdiń biregei tartýy Táýelsizdik alańynyń kórnekti tusyna, «Qazaq eli» monýmentine jaqyn jerde salynǵan.
Joba negizine Prezidenttiń «Álem. HHI ǵasyr» antiiadrolyq manifestiniń ideiasy engizilgen, sondyqtan nysan dál 29 tamyz - halyqaralyq iadrolyq synaqtarǵa qarsy áreket kúninde ashylyp otyr. Osydan týra 27 jyl buryn Prezident Jarlyǵymen Semei iadrolyq synaq alańy jabylǵan bolatyn. Bul - álemdegi eń iri iadrolyq qarýy bar eldiń biriniń odan bas tartý protsesiniń bastalýy edi.
Sáýletshiler atap ótkendei, qabyrǵa birtutas biriktirip, qorǵap turatyn japyraq tárizdes shatyrdy beineleidi. Iaǵni, dástúrli túrik quryltaiynyń ónegesimen ulttardy uiystyryp, olardy bir shańyraqtyń astyna jinaidy.
Metall men tabiǵi tastan turǵyzylǵan keshen úsh bólikten turady. Birinshi bóligi - bólshekteý men oqshaýlaýdy, ekinshi bóligi - úmit, erkindik pen táýelsizdikti, úshinshisi beibitshilik pen ultaralyq kelisimdi saqtaý jolyn beineleidi. Monýmenttiń jalpy uzyndyǵy - 111 metr, eni - 18,4 metr, biiktigi 17,5 metr.
«Beibitshilik qabyrǵasynyń» turqy tózimdi ári berik temirden jasalǵan. Monýmentti turǵyzýǵa jalpy aýmaǵy 6 myń tekshe metr bolatyn 1200 tonna granit paidalanylady. Memorialda álemniń 51 tilinde «Beibitshilik» degen sóz jazylǵan.
Avtorlar jobanyń kórnekti mazmunǵa ǵana emes, onyń fýnktsionaldyǵyna da jiti mán bergen. Aspaly shatyrdyń ashyq panelderi 2,5 million jaryq núktesi bar 616 tekshe metrdi alyp jatqan LED-júiege ie. Ol kez kelgen úlken kólemdegi sandyq dúnieni taratýǵa múmkindik beredi. Ekranǵa shyǵarý eýropalyq ónim óndirýshilerdiń eń sońǵy úlgidegi video, aýdio jáne kommýtatsiialyq jabdyqtar ornatylǵan serverlik bólmelerde júzege asyrylady. Sol sebepti bul tańǵajaiyp art-nysan - saiasi, mádeni-buqaralyq, aqparattyq sharalardy, lazerlik jáne basqa shoýlardy ótkizetin tamasha orynǵa ainalmaq.
Quny 1,8 milliard teńge turatyn «Beibitshilik qabyrǵasy» Aqtóbe oblysy aýmaǵynda jumys isteitin kompaniialar men kásipkerlerdiń qarjysyna salynǵanyn aita ketken jón. Olardyń qataryna «ERG», «Qazmunaigaz», «BIGroup», «Aqtóbesáýlet» JShS, «Astana-Dostroi» JShS, «BabekQurylys» JShS jáne taǵy basqalary bar.
.jpeg)