Qazaqstannyń halyq ártisi Dimash Qudaibergen Polshada ótken kontsertinde jańa ánderin tanystyryp, erekshe sahnalyq qoiylymdarymen kórermenderdi tánti etti, dep habarlaidy ult.kz.
18 qazanda Krakov qalasyndaǵy Tauron Arena sahnasynda ánshiniń DIMENSIONS atty jańa álemdik týrynyń alǵashqy kontserti ótti. Aýqymdy keshke álemniń túkpir-túkpirinen myńdaǵan jankúier jinaldy.
Dimash kontsertin qazaq tilindegi "Dimensions" ánimen ashty. Óner iesi jańa týrǵa arnaiy birneshe shyǵarma daiyndaǵan. Olardyń basym bóliginiń mýzykasyn ózi jazǵan. Sondai-aq keshte inisi Mansur Qudaibergenniń "Release My Soul" týyndysy alǵash ret oryndaldy.
Kontserttiń áserli sátteriniń biri – sahnada Dimashtyń bala kúnindegi jáne egde jastaǵy beineleriniń kórsetilýi boldy. Ánshi ekrandaǵy óz beinelerimen birge "Ómir" ánin oryndap, kórermenderge erekshe qoiylym usyndy.
Kesh barysynda Dimash Moldovadan kelgen Timýr esimdi kishkentai jankúierin sahnaǵa shaqyrdy. Bala ánshimen birge "S.O.S" jáne "Liýbov ýstavshih lebedei" ánderinen úzindi oryndady. Al poliak jankúierleri óner iesine óz tilderinde "Men sizderdi jaqsy kóremin" dep aitýdy úiretti.
Álemdik sahnada qazaqtyń ulttyq óneri de dáripteldi. Dimash "Aqerke", "Taý ishinde", "Dýrdaraz" halyq ánderin shyrqap, dombyra men qobyzdyń únin halyqaralyq aýditoriiaǵa jetkizdi.
Kontsert sońynda ánshi jankúierlerine alǵys aityp, kelesi kezdesýlerge shaqyrdy.
Aita keteiik, DIMENSIONS álemdik týry aiasynda Dimash segiz eldiń 11 qalasynda 12 kontsert ótkizýdi josparlaǵan. Polshadaǵy keshten keiin ánshi Germaniia, Ispaniia, Meksika, Kolýmbiia, Chili, Perý jáne Indoneziiada óner kórsetpek.
Dimash Qudaibergen kim?
Dimash Qudaibergen – qazaqstandyq ánshi, kompozitor, Qazaqstannyń halyq ártisi jáne halyqaralyq deńgeide tanylǵan óner iesi. Ol 1994 jyly 24 mamyrda Aqtóbe qalasynda dúniege kelgen. Tolyq aty-jóni – Dinmuhammed Qanatuly Qudaibergen. Ákesi Qanat Aitbaev pen anasy Svetlana Aitbaeva da mýzyka salasynda eńbek etken. Dimash bala kezinen mýzykaǵa qyzyǵyp, vokal jáne aspapta oinaý baǵytynda bilim alǵan. Ol Aqtóbedegi Ahmet Jubanov atyndaǵy mýzykalyq kolledjde oqyǵan. Keiin Qazaq ulttyq óner ýniversitetinde bilimin jalǵastyrǵan. 2015 jyly Belarýstegi "Slavian bazary" halyqaralyq baiqaýynda bas júldeni jeńip aldy.
2017 jyly Qytaidaǵy Singer mýzykalyq jobasyna qatysyp, ekinshi oryn ielendi. Osy jobadan keiin onyń tanymaldyǵy halyqaralyq deńgeide aitarlyqtai artty. Ánshi qazaq, orys, aǵylshyn, frantsýz jáne basqa da tilderde shyǵarmalar oryndaidy.
Onyń repertýarynda "S.O.S d'un terrien en détresse", "Umytylmas kún", "Aqqýym" jáne "Stranger" siiaqty ánder bar. Dimash joǵary jáne tómen registrlerdi qamtityn keń daýys diapazonymen erekshelenedi. 2023 jyly oǵan Qazaqstannyń halyq ártisi ataǵy berildi. Búginde Dimash Qudaibergen álemniń túrli elderinde kontsert ótkizip, qazaq mýzykasyn halyqaralyq sahnada tanystyryp júr.
