Memleket basshysy Astana qalasyndaǵy №85 mektep-litseige bardy

Bilim kúni Elbasy Astana qalasyndaǵy №85 mektep-litseige bardy, - dep habarlaidy "Ult aqparat" Aqordaǵa silteme jasap.

Memleket basshysy Katar Memleketiniń damý qorynyń qoldaýymen salynǵan №85 jańa mektep-litseidiń oqý kabinetterin aralap kórip, onyń materialdyq-tehnikalyq bazasymen tanysty, sondai-aq oqýshylarmen áńgimelesti.

Nursultan Nazarbaev jýrnalister aldynda sóilegen sózinde elimizdiń barsha oqýshylaryn, ustazdar qaýymy men ata-analardy Bilim kúnimen quttyqtap, osy saltanatty is-sharanyń elordada boi kótergen jańa oqý ordasynyń qabyrǵasynda ótýiniń simvoldyq máni bar ekenin aitty.

– Búginde respýblika boiynsha 181 mektep salynyp jatyr. 23 mekteptiń qurylysy aiaqtalyp, alǵashqy oqýshylaryn qabyldady. Qazaqstan boiynsha 7 myńnan astam mektep 3 million oqýshyǵa esik ashty. Sonyń 350 myńy – mektep tabaldyryǵyn alǵash ret attaidy, – dedi Qazaqstan Prezidenti.

Elbasy XXI ǵasyrdaǵy joǵary tehnologiialyq álemde ilim-bilim innovatsiianyń kilti jáne Qazaqstan damýynyń basty resýrsy sanalatynyn aityp, memleketimiz bilim berý salasyna zor mán berip otyrǵanyna toqtaldy.

Memleket basshysy fýnktsionaldyq saýattylyqty damytýǵa baǵyttalǵan orta bilimniń jańartylǵan mazmunyna kóshý qajettiligin atap ótip, oqýshylardyń qazirgi jaǵdaida alǵan bilimderi men mashyqtaryn tájiribede qoldana alýǵa tiis ekenine nazar aýdardy. Bul pedagogtiń biliktiligi men kásibiliginiń joǵary deńgeide bolýyn talap etedi.

– Memleket pedagogtardy daiarlaý, bilim salasyndaǵy eńbekaqy júiesin jetildirý jóninde júieli jumys júrgizip keledi. Osy oqý jylynan bastap attestatsiiadan ótken muǵalimderdiń jalaqysy jańa júie boiynsha 30-50 paiyzǵa artady, – dedi Qazaqstan Prezidenti.

Nursultan Nazarbaev zamanaýi tehnologiia dáýiri men Qazaqstannyń úshinshi jańǵyrýynyń talaptary balalarǵa sapaly bilim berip, olardyń taldaý jáne kreativti damý qabiletin qalyptastyrý úshin jańa mindetter qoiatynyn atap ótip, oqýshylardyń aqparattyq tehnologiia men shet tilderin erkin meńgerýi qajet ekenine nazar aýdardy.

***

1200 orynǵa arnalǵan bilim mekemesinde 48 kabinet bar. Jaratylystaný-matematika baǵytyndaǵy №85 mektep-litseidiń oqytý protsesi memlekettik bilim standartynyń talaptaryna sai innovatsiialyq tehnologiialardy paidalaný arqyly memlekettik jáne orys tilderinde júrgiziledi.