Memleket basshysy Qasym-Jomart Toqaev Premer-Ministr Asqar Mamindi qabyldady, dep habarlaidy Aqorda.
Prezidentke sanitarlyq-epidemiologiialyq jaǵdaidy turaqtandyrý úshin qabyldanyp jatqan sharalar jáne elimizdiń áleýmettik-ekonomikalyq damýynyń ózekti máseleleri týraly baiandaldy.
Asqar Mamin Prezidentke elimizdegi sanitarlyq-epidemiologiialyq jaǵdaidyń baqylaýda ekenin jetkizdi. Sondai-aq koronavirýs indetiniń jańa tolqynyna daiyndyq jumystary aiasynda júzege asyrylyp jatqan sharalar týraly málimet berildi.
Atap aitqanda meditsinalyq uiymdar men halyqty dári-dármekpen qamtamasyz etý, emdeý nysandaryna jasandy tynys berý apparattary men ottegi kontsentrattaryn jetkizý, aimaqtardy jyljymaly diagnostikalyq keshendermen, tsifrlyq rentgen-apparattarmen, mobildi toptarmen jáne jedel meditsinalyq kómek kórsetý kólikterimen jabdyqtaý jumystary júrgizilýde.
Qazirgi ýaqytta 13 aimaqtyń 10-ynda modýldik juqpaly aýrýhanalardyń qurylysy aiaqtalǵan, qalǵan 3 nysan osy jyldyń qarasha aiynyń sońyna deiin paidalanýǵa beriledi.
Memleket basshysyna respýblikalyq jáne aimaqtyq turaqtandyrý qorlarynyń qurylǵany jáne densaýlyq saqtaý júiesine arnalǵan 91 túrli dári-dármek pen jeke qorǵanysh quraldarynyń eki ailyq qory jasaqtalǵany týraly aityldy.
Dári-dármek tapshylyǵyn boldyrmaý úshin dárihanalardyń bólshek saýda júiesinde suranysqa ie 33-ten astam preparat qory qosymsha jasaqtalýda.
Asqar Mamin Qasym-Jomart Toqaevqa PTR test synamalaryn alý kólemin arttyrý jumystary týraly da málimet berdi. Onyń aitýynsha, zerthanalar sany 124-ke deiin kóbeiip, testileý qýaty táýligine 66 myńǵa deiin jetti. Bul rette, turǵyndardy test synamalarymen qamtý 2,5 ese ulǵaitylyp, PTR test synamalaryn alý quny tómendetildi.
Budan bólek, Asqar Mamin Prezidentke shekaralyq ótkizý beketterinde, sondai-aq, kóliktiń barlyq túrleri men infraqurylymdarynda sanitarlyq-epidemiologiialyq baqylaýdyń kúsheitilgeni týraly baiandady.
Sonymen qatar óńirlerdegi biznes sýbektileriniń jumysy birtindep qaita qalpyna keltirilýde. Osy rette, aimaqta virýs juqtyrý ósiminiń tirkelmeýi, turaqty epidemiologiialyq ahýaldyń «jasyl» deńgeide bolýy eskeriledi.
Premer-Ministr Memleket basshysyna kásipkerlerdi qoldaý, shetelden investitsiia tartý, jumyspen qamtý isin damytý jáne elimizdi áleýmettik-ekonomikalyq turǵydan órkendetýdiń basqa da ózekti máseleleri jóninde qabyldanǵan sharalar týraly baiandady.
Prezident koronavirýs pandemiiasynyń aldaǵy ailardaǵy taralýyna qatysty Dúniejúzilik densaýlyq saqtaý uiymynyń pessimistik boljamdaryn eskerip, Úkimet belgilegen jospardyń múltiksiz oryndalýynyń mańyzdy ekenin atap ótti.
Karantindi kúsheitý jónindegi qatań sharalardy kásipkerlerdiń múddelerin jáne jalpy elimizdiń ekonomikalyq damýyn eskere otyryp qabyldaǵan jón.
