Qazaqstan Prezidenti Astana qalasynyń ákimi Áset Isekeshevti qabyldady, - dep habarlaidy "Ult aqparat" Aqordaǵa silteme jasap.
Elbasyǵa biylǵy sáýir aiynda Astana qalasyn damytýǵa arnalǵan keńeste berilgen tapsyrmalardyń oryndalýy týraly esep berilip, qaladaǵy quqyqtyq tártipti qamtamasyz etýge jáne infraqurylymdy jaqsartýǵa qatysty atqarylyp jatqan jumystar jóninde málimet usynyldy.
Nursultan Nazarbaev elorda turǵyndary sanynyń artyp kele jatqanyna nazar aýdaryp, balabaqshalarmen jáne mekteptermen qamtamasyz etý boiynsha sharalar qabyldaý qajettigin atap ótti.
– Turǵyndar sany artyp keledi. Bul rette, kóshi-qon úderisin erekshe baqylaýǵa alý qajet. Elordada memlekettik baǵdarlamamen turǵyn úi berý júiesin jónge keltirý de mańyzdy, – dedi Memleket basshysy.
Astana qalasynyń ákimi Qazaqstan Prezidentine elordany damytýdyń birqatar ekonomikalyq indikatorlary óskenin aitty, sondai-aq qala turǵyndarynyń ómir súrýiniń ortasha uzaqtyǵy 75 jasqa jetkenin atap ótip, áleýmettik sala oń qarqynmen damyp kele jatqanyna toqtaldy.
Á.Isekeshev Elbasyǵa analar ólimi jáne ókpe aýrýy deńgeiiniń tómendegenin aitty.
Sonymen birge Astana qalasynyń ákimi «Taldykól» aǵyn sý jinaqtaýshysy ornalasqan jerdiń qunarlyǵyn qalpyna keltirý, jaýyn sý aǵatyn káriz júiesin jáne jol-kólik infraqurylymyn jetildirý baǵytynda qabyldanǵan sharalar jóninde esep berdi.
Nursultan Nazarbaev atqarylǵan sharalardyń nátijelerin oń baǵalap, elordany damytý jónindegi jumystardy jalǵastyrýdy tapsyrdy.
.jpeg)