Memleket basshysy Almaty qalasy Naýryzbai aýdanynyń ákimdigi men ákimshilik ǵimarattar keshenin aralap kórdi, dep habarlaidy "Ult aqparat" Aqordaǵa silteme jasap.
Elbasy Almaty qalasyndaǵy jumys sapary barysynda Naýryzbai aýdanynyń jańa ákimshilik-iskerlik ortalyǵyna bardy.
Qazaqstan Prezidentine Almatynyń jańa aýdanyn salǵan kezde elimizde jasalǵan qurylys materialdaryn paidalaný deńgeii 95 paiyzǵa jetkeni málimdeldi. 2 mektep, 3 emhana, 17 sport jáne balalar oinaityn alańdar salyndy. 33 balabaqsha qurylysy memleket-jekemenshik seriktestigi qaǵidaty boiynsha júzege asqan. Aýdannyń 100 paiyz gazben qamtamasyz etilýi mańyzdy infraqurylymdyq jetistik sanalady.
Budan bólek, Naýryzbai aýdanynyń ákimi S.Saifedenov Memleket basyshysyna salyq túsimderiniń 11 ese artqany, shaǵyn jáne orta biznes sýbektileriniń sany tórt ese óskeni jáne Almatynyń politsentristik strategiiasy aiasynda tabysty damyp keletini jóninde baiandady.
– Jańa ákimshilik ortalyq ashylǵaly memlekettik qyzmetterdiń barlyǵy bir jerden kórsetiledi. Jýyq arada munda jańa sport jáne mádeniet nysandary paida bolady, turǵyn úi men balabaqshalar salynýda, – dedi aýdan ákimi.
Sońynda Memleket basshysy aýdannyń Ardagerler keńesi múshelerimen áńgimelesti.
– Almaty qalasy turǵyndary sanynyń artýy sáikesinshe onyń aýmaǵyn da ulǵaitýdy qajet etedi. Úsh jyl buryn jańa Naýryzbai aýdanyn qurý jóninde sheshim qabyldandy. Osy ýaqyt ishinde tiisti infraqurylym jasaý jolynda kóp jumys atqaryldy. Qala ortalyǵymen yńǵaily ári jyldam qatynas ornatý úshin kólik máselesine qatysty qajetti sheshimder de qabyldanatyn bolady, – dedi Elbasy.
Ardagerler keńesiniń músheleri aýdan jurtshylyǵynyń atynan Nursultan Nazarbaevqa jańa aýdan qurylǵannan bergi úsh jylda oń ózgerister bolyp jatqanyna orai alǵys bildirdi.
***
Naýryzbai aýdanynyń jańa ákimshilik-iskerlik ortalyǵynda jergilikti ákimdik, sot, prokýratýra, halyqqa qyzmet kórsetý ortalyǵy, azamattyq hal aktilerin tirkeý bólimi, Qazposhta bólimshesi, zeinetaqy tóleý ortalyǵy, memlekettik kiris, ádilet basqarmalary jáne t.b. mekemeler ornalasqan.
.jpeg)