Foto: Aqorda
Prezident elimizde qoǵamnyń barlyq salasyn qamtyǵan aýqymdy reformalar júzege asyrylyp jatqanyna toqtaldy, dep habarlaidy Ult.kz.
– Naýryz aiynda Qazaqstannyń jańa Konstitýtsiiasy qabyldandy. Bul, eń aldymen, elimizdiń keleshegi úshin óte mańyzdy jáne tarihi qadam boldy. Azamattarymyz, ásirese, jastarymyz muny jaqsy túsinedi. Olar respýblikalyq referendýmǵa belsene qatysyp, Ata zańdy qoldap, daýys berdi. Jurtymyz bir qoǵam bolyp jaýapkershilik pen otanshyldyq rýhynyń ozyq úlgisin kórsetti. Tuǵyryna qonǵan jańa Konstitýtsiiada halqymyzdyń biregei bolmysy, basty qundylyqtary men biik maqsattary kórinis tapty. Búgin osy jiynǵa el jastary, bilimdi, bilikti, ziiatker azamattar qatysyp otyr. Men sizderdi Qazaqstannyń jarqyn bolashaǵy dep sanaimyn, – dedi Qasym-Jomart Toqaev.
Memleket basshysy ozyq oily jastar elimizdi biik belesterge bastap, ultymyzdyń mereiin ósiretinine senim bildirdi.
– Halyq Konstitýtsiiasy – óskeleń urpaqqa jol kórsetetin temirqazyq. Jańa Ata zańymyz – Ádiletti Qazaqstannyń myzǵymas tuǵyry. Zań men tártip qaǵidaty memleketimizdiń ózegine, ult sanasynyń arqaýyna ainaldy. «Taza Qazaqstan» tujyrymdamasy halqymyzdyń týǵan jerge, tumsa tabiǵatqa degen qamqorlyǵyn kúsheitti. Elimizde qoǵamdyq mańyzy bar jumysty mindet emes, qasterli paryz sanaityn naǵyz janashyr azamattar kóbeidi. Biz olardy eriktiler nemese volonterler dep ataimyz. Mine, osy qundylyqtardyń bári de Halyq Konstitýtsiiasynyń preambýlasyna arnaiy jazyldy. Memlekettiń basty bailyǵy – adam. Sondyqtan adam kapitalyn damytý konstitýtsiialyq mindet retinde aiqyndaldy. Bas qujatta elimizdiń ǵylym men bilimge, innovatsiiaǵa basymdyq beretini naqty kórsetildi, – dedi Prezident.
Qasym-Jomart Toqaev búginde álemniń asa joǵary jyldamdyqpen damyp kele jatqanyna nazar aýdardy. Prezidenttiń pikirinshe, qazirgidei qubylmaly, dúrbeleńge toly zamanda básekege qabiletti el bolyp, kósh sońynda qalmai, órkenietti elge sai ósip-órkendei berý qajet.
– Elimizde osy baǵytta naqty jumys istelip jatyr. Jasandy intellekt jáne tsifrlyq damý ministrligi quryldy. Jańa tehnologiialardy engizý úshin zańnamalyq negiz jasalyp, Tsifrlyq kodeks qabyldandy. «Jasandy intellekt týraly» Zań kúshine endi. Taiaý arada Qazaqstannyń tsifrlyq damý baǵdaryn aiqyndaityn Digital Qazaqstan strategiiasy bekitiledi. Bárińizge belgili, biyl elimizde – «Tsifrlandyrý jáne jasandy intellekt jyly». Sondyqtan aldymyzda áli de kóp jumys bar. Shiraq qimyldap, tutas qoǵam bolyp tabandy eńbek etýimiz kerek, – dedi Memleket basshysy.
Foto: Aqorda
Prezident tsifrlyq tehnologiialar men jasandy intellektiniń qarqyndy damýy tásilderdi únemi jańartyp otyrýdy talap etetinin atap ótti.
– Esepteýish infraqurylymyn ilgeriletý mańyzdy baǵyt bolyp qala beredi. Sýperkompiýter klasteriniń iske qosylýy elimizdiń tehnologiialyq derbestigin nyǵaitýdaǵy aitýly ýaqiǵa boldy. Kelesi maqsat – elimizde Derekterdi óńdeý ortalyǵy alqabyn qurý. Atalǵan aýqymdy jobany iske asyrý jańa investitsiia tartýǵa jáne óńirlik tsifrlyq hab retindegi pozitsiiamyzdy kúsheitýge múmkindik beredi. Jappai tsifrlandyrý jáne jasandy intellektini engizý elimizdi jan-jaqty jańǵyrtýdyń negizgi faktorlarynyń biri sanalady. Bul memlekettik basqarý júiesinen bastap kreativti indýstriiaǵa deiingi salalardy qamtidy. Jazda Astanada «Bolashaq oiyndary» ótedi. Dástúrli erejeler men kibersportty ushtastyratyn jarysqa álemniń 50 elinen myńǵa jýyq sportshy qatysady. Jańa sport túri ozyq tehnologiialardy kúndelikti turmysqa jedel beiimdeýge, eń bastysy, jastar arasynda sportty nasihattaýǵa jol ashady, – dedi Qasym-Jomart Toqaev.
Memleket basshysy kúzde Qazaqstanda Astana AI Film Festival atty taǵy bir mańyzdy halyqaralyq baiqaý uiymdastyrylatynyn aitty.
– Bul kreativti indýstriianyń damýyndaǵy irgeli ózgeristerdi kórsetetin jahandyq deńgeidegi alǵashqy is-shara bolmaq. Jasandy intellekt shyǵarmashylyq tabiǵatyna túbegeili betburys ákeledi, ózin tanytýdyń jańa formalaryn ashady ári talanttardyń aldynan shyǵatyn kedergilerdi azaitady. Qazaqstan osy jahandyq jańashyldyqtardyń bel ortasynda bolýǵa umtylady. Sonymen qatar jasandy intellekt áserinen kreativti indýstriia joiylady, qazirgi kúiinde saqtalmaidy degen pessimistik boljamdardy eskerý kerek. Sondyqtan barlyq úrdisti baqylap, ózgeristerge der kezinde beiimdelý qajet. Festivaldi uiymdastyrý Qazaqstandy halyqaralyq arenadaǵy innovatsiialar men jasampaz bastamalar ortalyqtarynyń biri retinde kórsetý úshin óte mańyzdy, – dedi Prezident.
Qasym-Jomart Toqaev tsifrlandyrý jáne jasandy intellektini jappai engizý úderisi aýqymdy ózgeristerge jol ashqanyn aitty.
– Sondyqtan biz azamattardyń áleýetin arttyrýǵa, olarǵa tsifrlyq daǵdylardy úiretýge basa mán berip otyrmyz. Búginde 650 myńnan astam stýdent Al Sana baǵdarlamasymen bilim alyp jatyr. Aldaǵy ýaqytta jasandy intellekt jáne deeptech-tehnologiiasyna qatysty taǵy da 100 myń maman daiarlaýymyz kerek. Biyl elimizde jańa úlgidegi tehnologiialyq bilim ordasy – Jasandy intellekt ýniversiteti ashylady. Bul ǵylym salasy úshin mańyzdy oqiǵa bolmaq. Endi aldymyzda turǵan ózekti mindet: biz osy salada bilikti maman daiarlaý isine erekshe kóńil bólýimiz kerek. Daryndy jastardy tartyp, olarǵa sapaly bilim berý qajet. Sondai-aq keleshegi zor tehnologiialyq jobalar men kompaniialarǵa qoldaý kórsetý airyqsha mańyzdy. Osyndai júieli jumystyń nátijesi de elimiz úshin tiimdi bolary anyq, – dedi Memleket basshysy.
Foto: Aqorda
Prezidenttiń aitýynsha, ushqyr oi men tereń bilim synǵa túsetin mundai dodalardyń bereri mol.
– Mazmundy ári tartysty jarystar arqyly jańashyldyq, izdenimpazdyq, jasampazdyq qundylyqtary keńinen dáripteledi. Qoǵamda jańa tehnologiialyq mádeniet qalyptasady. Alem.ai battle saiysyna mektep oqýshylary, stýdentter, jas ǵalymdar jáne IT salasynyń mamandary qatysty. Olar ózara tájiribe almasyp, bir-birine qoldaý kórsetti. Baiqaý aiasynda daryndy azamattarymyz densaýlyq saqtaý júiesi, bilim berý salasy jáne jasandy intellekt modelderin úiretý máselesine qatysty innovatsiialyq sheshimder usyndy. Sondyqtan bul saiysty ozyq ideialardyń básekesi desek, qate bolmaidy. Osyndai sharalar sizderdi kásibi turǵydan shyńdaidy, elimizde jáne álemde suranysqa ie bolatyn mańyzdy jobalardy iske asyrýǵa jol ashady dep senemin. AI Governance Cup baiqaýynyń da mán-mańyzy airyqsha. Bul saiysta jasandy intellektini memlekettik basqarý isine engizýge arnalǵan irgeli bastamalar usynyldy. Sonyń ishinde meditsinalyq kýálandyrý júiesin avtomattandyrý, intellektýaldyq prokýrorlyq qadaǵalaý, pedagogterdi qoldaý júielerin erekshe atap ótýge bolady. Munyń bári ideia nemese pilottyq joba deńgeiinde qalyp qoimaýy kerek. Negizgi maqsat – ozyq ideialar men bastamalardy memlekettik qurylymdardyń qyzmetine kezeń-kezeńimen engizip, jumystyń tiimdiligin arttyrý. Osyǵan basa nazar aýdarý qajet. Osyndai bedeldi baiqaýlarda júldeli bolý – shyn máninde, úlken jetistik. Sizderdiń jeńisterińiz – úzdiksiz izdenis pen tabandy eńbektiń jemisi ekeni sózsiz. Bárińizge shynaiy rizashylyǵymdy bildiremin. Memleket jańashyl, jasampaz azamattarǵa zor úmit artady, árdaiym qoldaý kórsetedi, – dedi Qasym-Jomart Toqaev.
Memleket basshysy jasandy intellekt salasyndaǵy alem.ai battle ulttyq baiqaýy men memlekettik organdar arasyndaǵy AI Governance Cup baiqaýynyń jeńimpazdaryn marapattady.
alem.ai battle jarysynyń jeńimpazdary tórt atalym boiynsha anyqtaldy:
- – AI Young Talents – aǵzadaǵy gliýkoza mólsherin invazivti emes tásilmen anyqtaityn SuGuard júiesi;
– AI Driving Power – muǵalimderdiń jumysyn avtomattandyrýǵa arnalǵan Ustaz AI sheshimi;
– AI Innovators – JI arqyly qaterli isikti erte kezeńde anyqtaýǵa arnalǵan Robio diagnostikalyq qolǵaby;
– Future Builders – JI-modelderin úiretýge qoldanylatyn sapaly derekterdi jinaýǵa jáne qalyptastyrýǵa arnalǵan NCSPEECH startap servisi.
