QR Memlekettik qyzmet isteri agenttigi memlekettik qyzmetshiler men olardyń otbasyna syilyq berýge tyiym salý normasyn túsindirdi, dep habarlaidy QazAqparat.
7 qazanda Memleket basshysy «Qazaqstan Respýblikasynyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» Zańǵa qol qoidy.
«Iaǵni, atalǵan Zańda memlekettik qyzmetshilerge jáne olardyń otbasy múshelerine syilyq berýge tyiym salý normasy qatańdatylǵan. Buǵan deiin Zańda memlekettik qyzmetshilerge quny 10 AEK-ten asatyn syilyq alýǵa tyiym salynǵan bolsa, qazir syilyq qunynyń mólsheri mańyzdy emes. Memlekettik qyzmetshige jáne onyń otbasy múshelerine kelip túsken barlyq syilyqtar, tipti olardyń habarynsyz kelgen syilyqtar da jeti kún ishinde memlekettik múlikti basqarýshy organǵa berilýi tiis. Bul syilyqtardy belgilengen tártippen satyp alý múmkindigi de saqtalady», - dedi QR Memlekettik qyzmet isteri agenttigi tóraǵasynyń orynbasary D.M.Jazyqbaev agenttikte ótken brifingte.
Alaida, bul tyiym jumystaǵy jetistikteri úshin jáne qyzmetkerlerdi kótermeleýdiń zańdy tásili retinde zańmen kózdelgen ózge de eńbegi úshin marapattaýda qoldanylmaidy.
Taǵy bir atap óterlik jait, joǵaryda kórsetilgen zańnamalyq shekteý memlekettik qyzmetshiniń jeke ómirindegi jaǵdailarǵa qoldanylmaidy. Mysaly, otbasylyq-saltanatty is-sharalarda jaǵdaiynda ol jaqyndary men týystarynan syilyqtar ala alady.
«Zańda syilyqtardy memlekettik múlikti basqarý jónindegi ýákiletti organǵa berý, syilyqtardy baǵalaý jáne satý máseleleri naqtylanǵan. Jergilikti atqarýshy organdar endi bul máselelermen ainalyspaidy. Joǵaryda aitqanymdai, memlekettik qyzmetshilerdiń syilyqty satyp alý quqyǵy saqtaldy. Memlekettik qyzmetshi nemese onyń otbasy músheleriniń habarynsyz shotqa túsken aqsha olar anyqtalǵannan keiin 2 apta ishinde mán-jaiy túsindirile otyryp, respýblikalyq biýdjetke aýdarylýy tiis», - dep túsindirdi D. Jazyqbaev.
Sonymen birge, Azamattyq kodekstiń 509-babyna engizilgen ózgeriske sáikes, memlekettik qyzmetshilerge kez-kelgen qundy syilyqtardy syiǵa tartýǵa tyiym salynady. Iaǵni, Azamattyq kodekstiń atalǵan babynyń memlekettik qyzmetshilerge qatysty syi tartý máselelerin retteitin erejeleri qaita qaralyp, onyń talaptary ózge zańnamalarmen, onyń ishinde, Qylmystyq jáne Ákimshilik kodekstermen sáikestendirildi.
