QR Memlekettik qyzmet isteri agenttiginiń resmi ókili Erhan Tatken memlekettik qyzmetke ornalasý tártibiniń ózgerýine qatysty QazAqparatqa túsinikteme berdi.
«Memlekettik organda bos jumys oryndary bolǵan kezde birinshi ishki konkýrs jariialanady, oǵan osy memlekettik organnyń qyzmetkerleri ǵana qatysady.
«Bul rette, buryn birinshi ishki konkýrstyń jeńimpazy bolmaǵan jaǵdaida ekinshi ishki konkýrs jariialandy, oǵan barlyq memlekettik qyzmetkerler qatysatyn. Ekinshi ishki konkýrstyń jeńimpazy bolmaǵan jaǵdaida ǵana barlyq azamattar arasynda jalpy konkýrs jariialanatyn. Osylaisha, memlekettik qyzmetke ornalasý konkýrsyna qatysý úshin azamattar memlekettik qyzmetshilerge qaraǵanda aitarlyqtai kóp ýaqyt kútetin»- dep atap ótti Erhan Tatken.
Qazirgi ýaqytta osylaisha ekinshi ishki konkýrs alynyp tastaldy. Endi bos jumys ornyn qurý kezinde barlyq memlekettik qyzmetshiler úshin birinshi ishki konkýrs jariialanady, al onyń jeńimpazy bolmaǵan jaǵdaida jalpy konkýrs jariialanady.
Osyǵan bailanysty, konkýrstyq rásimderdi ótkizý merzimi men azamattardyń konkýrsqa qatysý úshin kútý ýaqyty aitarlyqtai qysqardy. Sonymen, buryn bos laýazymdarǵa ornalasýǵa arnalǵan konkýrstardyń barlyq kezeńderin ótkizý úshin 50 jumys kúni qajet bolatyn. Qazir bul rásim 15 jumys kúnine deiin qysqartyldy.
Atalǵan ózgerister 2020 jyldyń 3 shildesinde Memleket basshysy Q.K.Toqaev qol qoiǵan «Qazaqstan Respýblikasynyń keibir zańnamalyq aktilerine memlekettik qyzmet máseleleri boiynsha ózgerister men tolyqtyrýlar engizý týraly» QR Zańy aiasynda júzege asyryldy.
