Memhatshy Germaniia Federativtik Respýblikasy Parlamenti Býndestaginiń depýtaty Sibille Pfaifermen kezdesti

Qazaqstan Respýblikasynyń Memlekettik hatshysy Gúlshara Ábdiqalyqova Germaniia Federativtik Respýblikasy Parlamenti Býndestaginiń depýtaty Sibille Pfaifermen kezdesti. Bul týraly Aqordanyń baspasóz qyzmeti habarlady.

Áńgimelesý barysynda G.Ábdiqalyqova Qazaqstan Táýelsizdiginiń 25 jyldyq mereitoiyn qarsy alýǵa daiyndalyp jatqanyn atap ótti. Tarihi ólshemmen alǵanda, elimiz qysqa merzim ishinde eleýli nátijelerge qol jetkizdi jáne búgingi tańda Qazaqstannyń aldynda álemniń eń damyǵan 30 eliniń qataryna qosylý maqsaty tur. Osy mindetke qol jetkizý úshin Qazaqstan Prezidenti Bes institýtsionaldyq reforma men «100 naqty qadam» ult josparyn usyndy.

Memlekettik hatshy Germaniia Qazaqstannyń Eýropalyq Odaqtaǵy basty seriktesi ekenin aitty. Kelesi jyly elderimiz arasyndaǵy diplomatiialyq qatynastyń ornaǵanyna 25 jyl tolady.

Kezdesý barysynda Qazaqstan men Germaniia arasyndaǵy ekonomikalyq, áleýmettik-mádeni ózara is-qimyl jóninde birqatar ózekti másele talqylandy. Taraptar qazirgi saýda-ekonomikalyq jáne investitsiialyq bailanystardyń damý qarqyny qanaǵattanarlyq ekenin atap ótti. Qazaqstan men GFR arasyndaǵy taýar ainalymy 2016 jylǵy qańtar-tamyz aralyǵynda 1,2 mlrd dollar boldy. Qazirgi ýaqytta Qazaqstan jaǵy men LANXESS, GEA, BASF, DACHSER, BAYWA siiaqty jetekshi nemis kompaniialary qurylys, himiia, farmatsevtika, mashina jasaý, energetika, aýyl sharýashylyǵy ónimderin qaita óńdeý, metallýrgiia jáne kólik-logistika salasynda investitsiialyq jobalardy júzege asyrý jóninde kelissózder júrgizýde.

Taraptar Qazaqstan Respýblikasy men EO arasyndaǵy keńeitilgen seriktestik jáne yntymaqtastyq týraly kelisimdi iske asyrý máselesine erekshe nazar aýdardy.

Sondai-aq, kezdesý barysynda áielderdi jan-jaqty qoldaý jáne BUU-nyń Ornyqty damý maqsattaryn iske asyrý máseleleri talqylandy.

Memlekettik hatshy Býndestag depýtatyna Astanada ótetin «EKSPO-2017» halyqaralyq kórmesine daiyndyq jóninde málimdedi. G.Ábdiqalyqova 2017 jylǵy 12 shildede Qazaqstannyń GFR-den keletin, Germaniianyń ulttyq pavilonynyń ashylýyna qatysatyn mártebeli meimandardy kútetinin aitty.

Sońynda Memlekettik hatshy Qazaqstan men Germaniia arasyndaǵy dialog pen ózara túsinistikti nyǵaitýǵa yqpal etkeni úshin S.Pfaiferge rizashylyǵyn bildirdi.