Shardjada qaza tapqan qazaqstandyq apaly-sińliler Aqjan men Juldyzdyń jaqyndary áleýmettik jelide taraǵan qaýesetterge qatysty úndeý jasady, dep habarlaidy ult.kz.
Marqumdardyń dostarynyń aitýynsha, sońǵy jańalyqtardyń astynda qyzdardyń ómiri men qyzmetine qatysty eshqandai dálelge negizdelmegen túrli pikirler jazylyp jatyr. Atap aitqanda, olardyń «kúnkóris úshin ketkeni», «joqshylyqtan ketkeni» nemese salonnan bólek jerde jumys istegeni týraly qaýesetter taraǵan.
Jaqyndary bul aqparattardyń shyndyqqa janaspaitynyn aityp, apaly-sińlilerdiń artynan jala jaýyp, qaýeset taratýdy toqtatýǵa shaqyrdy.
Olardyń aitýynsha, Aqjan men Juldyz tárbieli otbasynan shyqqan, bilimdi qyzdar bolǵan. Ekeýi de mektepti «Altyn belgimen» bitirgen. Astana qalasynda óz eńbekterimen salon ashyp, kásibin damytýǵa tyrysqan.
«Qurbym Aqjan 18-19 jasynan bastap óz salonynda eńbek etip, kásibin damytýǵa tyrysty. Dýbaiǵa da ýaqytsha baryp, tájiribe jinap, jańa el kórip, damyp, alǵa qoiǵan maqsattaryna jetýdiń bir joly retinde tańdaǵan edi. Olar eshkimge ziiany timeitin, adal eńbegimen ómir súrip júrgen qyzdar boldy», — delingen úndeýde.
Qyzdardyń dostary qazir olardyń ata-anasy men týǵan-týystaryna eń keregi qoldaý men sabyr ekenin atap ótti.
«Bir úidiń qos birdei sulý, qarakóz qyzynan aiyrylý ata-anasyna, týǵan-týystaryna qanshalyqty aýyr ekenin sózben jetkizý múmkin emes. Sondyqtan ótinish, jaqyndarynyń jarasyna tuz seppeiik», — dep jazdy olar.
Jaqyndary jurtshylyqty dálelsiz qaýeset taratpaýǵa, marqumdardyń artynan jaman sóz aitpaýǵa jáne otbasysyna qoldaý kórsetýge shaqyrdy.
Buǵan deiin áleýmettik jelilerde marqumdardyń jaqyndary qyzdardyń denesin Qazaqstanǵa jetkizýde qiyndyq týyndaǵanyn aityp, kópshilikten kómek suraǵan.
