Óskemende úsh balanyń anasy kámeletke tolmaǵan qyzyna qatysty qylmystyq is boiynsha quzyrly organdardan arasha surady. Ainur Súleimenova áleýmettik jelide video jariialap, biyl aqpanda qozǵalǵan istiń tergeýi áli aiaqtalmaǵanyn aitty, dep habarlaidy ult.kz.
KTK telearnasynyń málimetinshe, áielge, eki jastan asqan qyzy ákesiniń ózine qatysty orynsyz áreketter jasaǵanyn aityp bergen. Osydan keiin anasy balany dárigerge kórsetken. Onyń sózinshe, tekserý kezinde balanyń denesinde qabyný belgileri anyqtalyp, ol em qabyldaǵan.
Ainur Súleimenova qyzynyń qatty qorqyp qalǵanyn aityp, istiń sońyna deiin jetkizilip, kináli adam zań aldynda jaýap berýin talap etti.
— Kámeletke tolmaǵan balanyń anasy retinde ádildik ornaǵanyn qalaimyn. Qyzymnyń quqyǵyn qorǵańyzdar. Qylmystyq is 121-baptyń 4-bóligi boiynsha qozǵalǵan edi. Tergeý áli aiaqtalǵan joq. Quzyrly organdardan bul isti qatań baqylaýǵa alýdy suraimyn, — dedi ol.
Politsiianyń málimetinshe, kúdiktige qatysty sotqa deiingi tergeý júrgizilip jatyr. Alǵashynda oǵan bultartpaý sharasy qoldanylǵan, keiin tergeý sotynyń qaýlysymen úiqamaqqa alynǵan.
— Qazir sotqa deiingi tergep-tekserý jalǵasýda. Tergeýdiń tolyqtyǵyn, jan-jaqtylyǵyn jáne obektivtiligin qamtamasyz etýge baǵyttalǵan qajetti áreketter júrgizilip jatyr, — dep habarlady ShQO PD baspasóz qyzmeti.
Anasy kúdiktiniń úiqamaqqa alynýyna alańdap, qylmystyq istiń obektivti tergelýin surap otyr. Sonymen qatar ol istiń aiaqsyz qalýynan qaýiptenetinin jetkizdi.
