Túrkistan oblysynyń Keles aýdanynda Keles ózenine sýǵa ketken balany izdeý jumystary qaita bastaldy, dep habarlaidy ult.kz.
Qutqarýshylar balany Qurylys eldi mekeni mańyndaǵy ózennen izdep jatyr. Izdeý jumystaryna 90-ǵa jýyq adam jumyldyrylǵan. Olardyń qatarynda Tótenshe jaǵdailar departamentiniń qyzmetkerleri, qutqarýshylar, politsiia, jergilikti atqarýshy organdardyń ókilderi, muǵalimder, eriktiler jáne balanyń týystary bar.
Jumysqa qutqarý katerleri, eholottar, drondar jáne sý astyndaǵy drondar tartyldy. Izdeý jumystaryna Shymkent qalasy men Jambyl oblysynyń qutqarýshylary da qatysyp jatyr.
Eske salaiyq, 23 naýryzda 2018 jyly týǵan bala oiyn kezinde abaisyzda sýǵa qulap ketken.
Tótenshe jaǵdailar ministrligi azamattardy sý aidyndarynda qaýipsizdik talaptaryn saqtap, balalardy qaraýsyz qaldyrmaýǵa shaqyrdy.
