Birikken Arab Ámirlikteriniń Shardja qalasynda Qazaqstannyń eki azamaty qaza tapty. Bul aqparatty Qazaqstannyń Syrtqy ister ministrligi rastady, dep habarlaidy ult.kz.
Vedomstvo málimetinshe, qazir jergilikti quzyrly organdar oqiǵanyń barlyq mán-jaiyn anyqtap jatyr. Tergeý júrip jatqandyqtan, qosymsha aqparat ázirge jariialanbaidy.
Qazaqstannyń Dýbaidaǵy Bas konsýldyǵy marqumdardyń otbasylaryna qajetti konsýldyq-quqyqtyq kómek kórsetip jatyr. Diplomattar qujattardy rásimdeýge jáne BAÁ quzyrly organdarymen bailanys ornatýǵa járdemdesýde.
SIM qaza tapqan A. B. jáne J. B. esimdi azamattardyń týǵan-týystary men jaqyndaryna kóńil aityp, otbasylarymen turaqty bailanysta ekenin málimdedi.
Marqumdardyń týystarynyń aitýynsha, 2004 jáne 2006 jyly týǵan eki qyz Shardja qalasynda jumys istegen. Olar tamyz aiynyń sońy nemese qyrkúiektiń basynda Qazaqstanǵa qaitýdy josparlaǵan.
Alaida shamamen bir apta buryn qyzdar jaqyndarymen bailanysqa shyqpai qalǵan. Keiin týystaryna olardyń deneleri tabylǵany belgili bolǵan.
Otbasy ókilderiniń sózinshe, qyzdar pyshaq jaraqatynan kóz jumǵan bolýy múmkin. Sondai-aq týystary oqiǵaǵa qatysy bar kúdiktiniń ustalǵanyn jáne onyń Qazaqstan azamaty bolýy yqtimal ekenin aitqan.
Degenmen qyzdardyń naqty neden qaza bolǵany, kúdiktiniń ustalǵany jáne onyń azamattyǵy týraly málimetterdi resmi organdar ázirge rastaǵan joq.
Áleýmettik jelilerde marqumdardyń jaqyndary qyzdardyń denesin Qazaqstanǵa jetkizýde qiyndyq týyndaǵanyn aityp, kópshilikten kómek suraǵan.
