Shymkent mektepterinde memlekettik satyp alýlar, pedagogterdiń júktemesi jáne áleýmettik kómek alatyn otbasylarǵa qatysty birqatar kúmándi derek anyqtaldy. Bul málimetter tsifrlyq taldaý arqyly belgili bolǵan, dep habarlaidy ult.kz.
«Jetinshi arna» málimetinshe, taldaý barysynda mektepterdiń biriniń biýdjet qarajatyna 70 balta satyp alǵany anyqtalǵan. Alaida bul quraldardyń qandai maqsatta alynǵany belgisiz. Budan bólek, úsh býhgalterge 55 kalkýliator satyp alýǵa tapsyrys berilgen.
Tsifrlyq júie pedagogterge qatysty da sáikessizdikterdi anyqtaǵan. Atap aitqanda, bir muǵalimge 70 saǵat oqý júktemesi berilgen. Sondai-aq bir qyzmetkerdiń bir mezette eki basshylyq qyzmetti atqarǵany belgili boldy.
Áleýmettik kómekke qatysty júrgizilgen taldaý kezinde ózin az qamtylǵan otbasy retinde kórsetken kei azamattardyń jeke dúkenderi, jer telimderi jáne birneshe avtokóligi bary anyqtalǵan. Olardyń bir bóligi áleýmettik kómek alýǵa quqyǵyn rastaityn qujattardy usyna almaǵan.
Jalpy tsifrlyq taldaý bilim berý salasynda 12 baǵyt boiynsha talaptardyń saqtalmaǵanyn kórsetken.
Shymkent qalasy ákiminiń orynbasary Sársen Quranbektiń aitýynsha, tsifrlandyrý biýdjet qarajatyn tiimdi paidalanýǵa múmkindik berip otyr.
«Tsifrlandyrý óte kóp kómektesti. Byltyr 10 mlrd 200 mln teńge únemdedik. Búgingi tańda shamamen 15 mlrd teńge únemdeldi. Jyl sońyna deiin únemdelgen qarajat kólemi odan da arta túsedi dep oilaimyn», – dedi ol.
