QR Bilim jáne ǵylym vitse-ministri Sholpan Karinova mektep túlekteriniń qorytyndy attestattaýyna qatysty túsinik berdi, dep habarlaidy QazAqparat.
«9 jáne 11 synyp oqýshylarynda biyl qorytyndy attestattaý júrgiziledi. Qorytyndy attestattaý sany qysqartyldy, iaǵni toǵyzynshy synypta 3 pán boiynsha jáne 11-synypta 4 pán boiynsha eskerilgen. Qorytyndy attestattaýdyń negizinde 9-synypta negizgi bilim alý jónindegi attestat jáne 11- synypta orta bilim alý jónindegi attestat alady», - dedi Sh. Karinova ministrliktiń apparat jinalysynda.
Onyń aitýynsha, toǵyzynshy synyp úshin birinshi emtihan oqytý tiline bailanysty 28 mamyr kúni ótkiziledi. Bul turǵyda jańartylǵan bilim berý mazmunyna qatysty engizilgen ózgeristerge sáikes, toǵyzynshy synyp oqýshylary esse jazady. Ony ótkizýge eki saǵat ýaqyt beriledi.
Ekinshi emtihan 3 maýsym kúni (algebra) uiymdastyrylady. Osy oraida 10 testi suraǵy men 5 tapsyrmany oryndaý júkteledi. Úsh saǵat ýaqytta oqýshylar emtihandy jazbasha túrde tapsyrady.
Kelesi emtihan (5 maýsymda) ekinshi oqytý tiline bailanysty júrgiziledi. Bul jerde usynylatyn tapsyrmaǵa eki saǵat bólinedi.
«11-synyp oqýshylaryna toqtalsaq, olar tórt emtihan tapsyrady. 1 maýsym kúni oqytý tiline bailanysty emtihan jazbasha túrde júrgiziledi. Osy oraida esse taqyryptary Ulttyq biryńǵai testileý ortalyǵynda kórsetilgen. Bul jumysqa ár oqýshyǵa 3 saǵat beriledi. Budan bólek, 4 maýsymda algebra páni boiynsha jazbasha emtihan júrgiziledi. Oǵan 5 saǵat ýaqyt bólinedi», - dedi vitse-ministr.
Munymen qosa, 7 maýsymda 11-synyp úshin Qazaqstan tarihynan testileý eskerilgen. Al 10 maýsymda ekinshi oqytý tiline bailanysty emtihan bolady.
Budan buryn habarlanǵandai, 2020-2021 oqý jylyn 3,4 mln astam oqýshy aiaqtap jatyr. Olardyń ishinde 150 myńǵa jýyǵy — 11 (12) synyp túlekteri, 270 myńǵa jýyǵy — 9 synyp oqýshylary.
