Bilim berý salasyndaǵy qyzmetti nyǵaitý maqsatynda «El Úmiti» bastamasyn iske asyrý aiasynda Tuńǵysh Prezident Qory men «Elbasy akademiiasy» korporativtik qory 2020 jyldyń shilde aiynda balalar men jastarǵa arnalǵan «Elbasy medali» jańa jobasyn iske qosqan bolatyn. Bilim berý basqarmalarynyń uiymdastyrýymen atalǵan baǵdarlamaǵa 14-29 jas aralyǵyndaǵy jas qazaqstandyqtar qatysyp, nur-sultandyq jáne aqmolalyq oqýshylar «Elbasy medalimen» marapattaldy, - dep habarlaidy «Ult aqparat».
Osylaisha Nur-Sultanda «Elbasy medali» jobasyna qatysqan nur-sultandyq 28 oqýshy men aqmolalyq 41 oqýshy marapattaldy. Balalardy jáne jastardy damytý diagnostikalaý ortalyǵynyń basshysy Gúlim Júsipovanyń aitýynsha, byltyrdan bastap 11 myń bala «Elbasy medali» jobasyna qatysqan. Munda ár balaǵa jeti baǵytta tapsyrmalar beriledi: sport, talanttar men daǵdylar, kitap oqý, ulttyq mura, volonterlik, ekspeditsiialar men joryqtar, eńbek praktikasy. Ár qatysýshyǵa arnaiy tálimger belgilenedi. Olar tapsyrmalardy balalardyń tulǵalyq erekshelikterine sai berip otyrady. Barlyǵy respýblika boiynsha 11 myń qatysýshyǵa 600-den asa tálimger belgilengen. Tapsyrmalardyń oryndalýy telefon arqyly qadaǵalanǵan.
«Jastar – el bolashaǵy. Elbasy Nursultan Nazarbaev jastarymyz ǵylymmen ainalyssa, bizdiń bolashaǵymyz zor bolmaq degen bolatyn. «Elbasy medali» – jastardy keshendi damytýǵa baǵyttalǵan ulttyq deńgeidegi jalǵyz baǵdarlama. Búgin osy jerde otyryp, sizder maqsattaryńyzǵa jetý jolynda aianbaityndyqtaryńyzdy dáleldedińizder. Sizderge zor densaýlyq pen sáttilik tileimin. Tek alǵa umtylyp, arman qýyńyzdar. Ár adam 6 ai boiy bir baǵytta jumys jasai berse, aqyrynda ol ádetke ainalady. Bizdiń maqsatymyz osy», - dedi Balalardy jáne jastardy damytý diagnostikalaý ortalyǵynyń basshysy Gúlim Júsipova.
Aita keteiik, «Elbasy medali» jobasynyń qola deńgeiine 14 jastap bastap qatysýǵa bolady, bul deńgeide tapsyrmalar 6 aiǵa alynady. Kúmis deńgeige 15 jastap bastap qatysyp, 12 aiǵa tapsyrmalar alýǵa bolady. Al altyn medal alý úshin tapsyrmalar 18 aiǵa beriledi. Bul deńgeide qatysýshylar jasy 16-dan bastalady.
Sonymen qatar, Naýryz meiramy qarsańynda Aqmola oblysynyń ákimi Ermek Marjyqpaev bilim saiystarynda joǵary nátijege qol jetkizgen daryndy balalardy «Elbasy medali» qola nagradasymen marapattady. Belgili bolǵanyndai, Aqmola oblystyq máslihaty sessiiasynyń 2020 jylǵy 10 maýsymdaǵy sheshimi boiynsha «Elbasy medali» baǵdarlamasyn iske asyrýǵa 40 million teńge bólindi. 2021 jyly baǵdarlamany júzege asyrý úshin 69 million 888 myń teńge bólinip otyr.
Marapatqa ie bolǵan jastardyń biri - Nur-Sultan qalasy memlekettik akademiialyq filarmoniiasynyń solisi Ábdilda Altynbek. Ol «Elbasy medali» jobasyna ótinimderdi qabyldaý kezeńiniń bastalǵanyn ǵalamtor arqyly Nazarbaev qorynyń paraqshasynan bilgen eken.
«Joba aiasynda alty aidyń ishinde berilgen tapsyrmalardy oryndap, búgin marapatqa ie boldym. Sóitip, kitap oqý baǵyty boiynsha Saiyn Muratbekovtiń «Jabaiy alma», álem klassikteri qatarynan Pýshkinniń «Evgenii Oneginin» oqyp shyqtym. «Daryn men daǵdy» baǵyty boiynsha Ahmet Jubanov pen Latif Hamididiń «Abai» operasyndaǵy Abaidyń basty partiiasyn, Evgenii Býsilovskiidiń «Qyz Jibek» operasynan bas keiipker Bekejannyń partiialaryn jattadym. Bul men úshin úlken jetistik. Aldaǵy ýaqytta jobanyń kúmis deńgeiine qatysatyn oiym bar», - deidi qola medal iegeri Ábdilda Altynbek.
Aita keteiik, Barlyǵy respýblika boiynsha 3335 qatysýshy qola deńgeiindegi «Elbasy medali» iegeri atandy. «Elbasy medali» - Elbasynyń baqylaýymen atqarylatyn talantty jáne básekege qabiletti jastardy tárbieleý jónindegi biregei joba. Joba 14-29 jas aralyǵyndaǵy jastardy tárbieleýge baǵyttalǵan jáne 7 baǵyt boiynsha damý baǵdarlamasyn kózdeidi: sport, daryn men daǵdy, kitap oqý, ulttyq mura, eriktilik, saiahat pen joryqtar, eńbek tájiribesi. Qatysýshylar úsh deńgeidi tańdai alady: qola, kúmis nemese altyn, olar 6 aidan 18 aiǵa deiin ár baǵyt boiynsha belgili bir qyzmetti oryndaýdy kózdeidi. Qazirgi ýaqytta jobaǵa 11 myńnan astam qatysýshy, 600 tálimger, 17 óńirlik úilestirýshi men sarapshy qatysýda. Byltyr Táýelsizdik merekesi qarsańynda barlyq óńirlerdegi 300 jobaǵa qatysýshy qola medalmen marapattaldy.
Jyl boiy ótetin «Elbasy medali» baǵdarlamasyna qatysýǵa ótinimder qabyldaý jalǵasýda. Kelesi finalister 2021 jyldyń jeltoqsanynda belgili bolady.
Esterińizge sala keteiik, bilim berý salasyndaǵy qyzmetti nyǵaitý maqsatynda «El Úmiti» bastamasyn iske asyrý aiasynda Tuńǵysh Prezident Qory men «Elbasy akademiiasy» korporativtik qory 2020 jyldyń shilde aiynda balalar men jastarǵa arnalǵan «Elbasy medali» jańa jobasyn iske qosqan bolatyn. Bilim berý basqarmalarynyń uiymdastyrýymen atalǵan baǵdarlamaǵa 14-29 jas aralyǵyndaǵy jas qazaqstandyqtar qatysyp, nur-sultandyq jáne aqmolalyq oqýshylar «Elbasy medalimen» marapattalǵan bolatyn.
