Astana qalasyndaǵy №114 mektepte «Mektep kúres ligasy» jobasy aiasynda kúres sportyna arnalǵan arnaiy jabdyqtardy tapsyrý rásimi ótti. Joba mektep sportyn damytý maqsatynda Týrizm jáne sport ministrligi, Oqý-aǵartý ministrligi jáne Qazaqstan kúres federatsiiasynyń birlesken bastamasymen júzege asyrylyp jatyr, dep habarlaidy ult.kz.
Is-sharaǵa Týrizm jáne sport ministri Erbol Myrzabosynov, Oqý-aǵartý ministri Juldyz Súleimenova, Qazaqstan kúres federatsiiasynyń prezidenti Erkin Oqasov jáne sport salasynyń ókilderi qatysty.
Mektepterdiń sport zaldaryn kúreske qajetti arnaiy jabdyqtarmen qamtamasyz etý eldegi kúres sportyn damytýǵa, sondai-aq jasóspirimderdiń sportpen turaqty túrde ainalysýyna múmkindik beredi. Sonymen qatar joba bilim berý uiymdarynda kúrespen shuǵyldanýǵa qolaily orta qalyptastyrýǵa baǵyttalǵan. Osy bastama aiasynda №114 mektepke statsionarlyq kúres kilemi tabystaldy.
«Memleket basshysy buqaralyq sportty damytýǵa, balalar men jasóspirimderdiń sportpen júieli túrde ainalysýyna erekshe kóńil bólip keledi. Osy mindetterdi iske asyrý aiasynda bilim berý uiymdarynda ulttyq jáne olimpiadalyq sport túrlerin keńinen nasihattaý jumystary júrgizilýde. Kúres – halqymyzdyń rýhymen bite qainasqan, batyldyq pen tabandylyqqa tárbieleitin sport túri. Búgin mektepke tabystalyp otyrǵan kúres kilemi oqýshylardyń sportpen turaqty ainalysýyna, sheberlikterin shyńdaýyna jáne bolashaq chempiondardyń qalyptasýyna óz úlesin qosady dep senemin», – dep atap ótti Erbol Myrzabosynov.
Sondai-aq is-shara barysynda úshjaqty yntymaqtastyq týraly memorandýmǵa qol qoiyldy.
Memorandým aiasynda Birikken kúres álemi (United World Wrestling) uiymynyń qoldaýymen «Olimpiadalyq yntymaqtastyq» baǵdarlamasyn iske asyrý, erekshe bilim berý qajettiligi bar balalar arasynda grek-rim, erkin jáne áielder kúresin damytý, sondai-aq seminarlar men biliktilikti arttyrý kýrstaryn uiymdastyrý kózdelgen.
Jobanyń negizgi maqsaty – oqýshylar arasynda buqaralyq sportty damytý, kúres túrlerin barynsha qoljetimdi etý jáne bolashaq jas sportshylardy daiarlaýǵa qolaily jaǵdai qalyptastyrý.
