Ánshi Sáken Maiǵaziev ónerdegi dosy Meirambek Bespaevtyń 50 jasqa tolýyna orai júrekjardy tilegin arnady, dep habarlaidy ult.kz.

Óner iesi áleýmettik jelidegi jazbasynda ekeýiniń shirek ǵasyrdan astam ýaqyt boiy jup jazbai, qýanysh pen qiyndyqty birge ótkergenin aitty.

“Shirek ǵasyrdan astam ýaqyt bir áke, bir anadan týǵandai baýyrmyz, áriptespiz, syrlaspyz, saparlaspyz, dámdespiz, dosym. Sol sanaly ǵumyrymyzda jadymyzda jattalyp qalar jarqyn kúnder, sáýleli sátter, shýaqty shaqtarymyz óte kóp. Tańdy tańǵa uryp aitatyndai esti estelik, tátti muń, kúrdelileý kezeńderdi de bastan ótkerdik”, – dep jazdy Sáken Maiǵaziev.

Ánshi dosyn “qazaqtyń maqtanyshy” dep atap, oǵan uzaq ǵumyr tiledi. Sondai-aq Meirambek Bespaevtyń ata-anasyna jáne ónerdegi ustazy Altynbek Qorazbaevqa aq tilegin jetkizdi.

Aita keteiik, Meirambek Bespaevtyń jary mereitoilyq kontsertten keiin jazba jariialady.

Meirambek Bespaev kim? 
 

Meirambek Ábiláshimuly Bespaev — qazaq estradasynyń tanymal ánshisi, “MýzART” tobynyń múshesi, Qazaqstannyń eńbek sińirgen qairatkeri. Ol 1976 jyly Jambyl oblysynda dúniege kelgen. Jastaiynan án aityp, qońyr daýsymen tyńdarman yqylasyna bólengen. Tarazdaǵy Glinka atyndaǵy mýzykalyq mektepte qobyz synybynda bilim alyp, keiin Almatydaǵy Kúlásh Baiseiitova atyndaǵy mýzykalyq mektepte oqýyn jalǵastyrǵan. Temirbek Júrgenov atyndaǵy óner akademiiasynyń akterlik bólimin bitirgen.

Onyń óner jolynda ánshi ári kompozitor Altynbek Qorazbaevtyń orny erekshe. Ustazy baptap, úlken sahnaǵa jetelegen Meirambekti kópshilikke tanytqan týyndylardyń biri — “Boztorǵai” áni.

Keiin “MýzART” tobynyń quramynda da, jeke oryndaýshy retinde de halyq ánderi men estradalyq shyǵarmalardy shyrqap keledi. Ónerdegi eńbegi úshin “Daryn” memlekettik jastar syilyǵyna ie bolǵan. 2012 jyly oǵan “Qazaqstannyń eńbek sińirgen qairatkeri” ataǵy berildi.