QR Bilim jáne ǵylym vitse-ministri Sholpan Karinova biyl mektep bitirý keshterý qandai formatta ótetinin túsindirdi, dep habarlaidy QazAqparat.
«Mektep birtirýshiler úshin emtihandar aiaqtalǵannan keiin, 11-synyp oqýshylary úshin 12-14 maýsym aralyǵynda mektep bitirý keshterin uiymdastyrý máselesi qarastyrylady. Mektep bitirý keshterin uiymdastyrýǵa bailanysty is-sharalar ashyq, taza aýada ótkizilýi Densaýlyq saqtaý ministrligimen kelisilgen. Bul turǵyda oqýshylary az mektepter osy is-sharany barlyq synyp úshin ótkize alady. Al mektep bitirýshi synyptar kópteý bolǵanda, birneshe kezeńge bólip uiymdastyrý múmkindigi bar», - dedi Sh. Karinova ministrliktiń apparat jinalysynda.
Osy oraida ol bul is-sharanyń negizgi maqsaty mektep túlekteriniń jalpy orta bilimdi aiaqtap, bilimi týraly qujatty alýyna arnalǵanyn eske saldy.
«Sondyqtan mektep bitirý keshin ótkizý kezinde árbir mekteptiń ishinde resmi túrde attestatty tabystaý is-sharasyn uiymdastyrý usynylady. Sonymen qatar, dastarhan jaiýǵa nemese basqa da kóńil kóterý oryndarynda (toihana, meiramhana, dámhana) ruqsat etilmeidi. Bul is-shara tek mektepte resmi túrde attestat tabystaýdy eskeredi», - dedi vitse-ministr.
Aita keteiik, mektep bitirý keshin sanitarlyq qaýipsizdik talaptaryn saqtaý arqyly ótkiziledi. Osy oraida merekelik animatorlardy, túrli toi uiymdastyrý agenttikterin, jeke stýdiialardy shaqyrtýǵa tyiym salynǵan.
Budan buryn habarlanǵandai, sońǵy qońyraý ádettegidei 25 mamyrda ótkiziledi. Biylǵy shekteý is-sharalary eskerilip, birneshe format usynylmaq. Birinshiden, dástúrli túrde ashyq taza aýada 9 jáne 11-synyp oqýshylary úshin, sondai-aq 300-ge deiin oqýshysy bar ári osy ýaqytqa deiin shtattyq rejimde oqytyp kele jatqan mektepter ótkizedi.
