Meksikada seisenbi kúni jergilikti ýaqytpen 13:14 kezinde bolǵan kúshti jer silkinisinen opat bolǵandar sany 200 adamnan asty, - dep habarlaidy "Ult aqparat" NTV arnasyna silteme jasap. Zilzala qurbandarynyń sany taǵy kóbeiýi múmkin.
AQSh geologiia qyzmetiniń habarlaýynsha, 7,1 magnitýdaly jer silkinisiniń epitsentri el astanasy Mehikodan shamamen 120 shaqyrym qashyqtyqta, Pýebla shtatyndaǵy Atensingo qalasyna jaqyn mańda, jerdiń 51 kilometr tereń qabatynda bolǵan.
Jergilikti bilik ókilderiniń habarlaýynsha, tabiǵi apattan Mehiko, Pýebla jáne Morelos shtattary zardap shekken. Mehikoda, Pýeblada ondaǵan úi qiraǵan. 3 millionnan astam turǵyn elektr qýatynan ajyrap qalǵan. Jer silkinisinen zardap shekken birneshe shtatta mektepter, Mehiko qalasynyń áýejaiy jabylǵan.
Apat saldarynan ǵimarattar qulap, adamdar zardap shekken aýdandarda qutqarý jumystary jalǵasyp jatyr. Qirandylar astynda adamdar qalyp qoiǵan bolýy múmkin degen boljam bar.
AQSh prezidenti Donald Tramp zilzalaǵa bailanysty kóńil aitqan.
"Mehiko turǵyndaryn Qudai jarylqasyn. Biz sizdermen birgemiz jáne járdem tanytamyz", - dep jazǵan ol Twitter áleýmettik jelisindegi paraqshasynda.
Sársenbi kúni tańerteń Qazaqstan syrtqy ister ministrligi Meksikadaǵy jer silkinisinen zardap shekkender arasynda qazaqstandyqtar bar ekeni jaily málimet túspegeni týraly habarlady.
