Shetelge ketý – árbir azamattyń jeke sharýasy, biraq elden ketip, Reseidiń Ýkrainadaǵy áreketin synaý satqyndyq. Reseidiń memlekettik RIA "Novosti" agenttigine bergen suhbatynda Resei Qaýipsizdik keńesi tóraǵasynyń orynbasary Dmitrii Medvedev osylai dep málimdedi.
"Elden jái ketkender men biliktiń sheshimine belsene qarsy shyǵyp, qarsy tarapqa ótip ketkender arasynda úlken aiyrmashylyq bar" dedi Medvedev. Ol - beibit kúnderi bilikti synaý qalypty jaǵdai, al soǵys nemese arnaiy operatsiia kezinde Kremlge syn aityp, Reseige "jeńilis tileýdi" satqyndyq dep ataýǵa keledi dep sanaidy.
Resei áskeri prezident Vladimir Pýtinniń buiryǵymen 24 aqpanda Ýkraina aýmaǵyna kirgen.
4 naýryzda Pýtin Resei armiiasynyń áskeri týraly jalǵan aqparat taratyp, áskerdiń bedeline nuqsan keltirgenderdi qylmystyq jaýapkershilikke tartý týraly jarlyqqa qol qoidy. Mundai áreketke barǵandarǵa 15 jylǵa deiin túrme jazasy qarastyrylǵan.
22 naýryzda memlekettik dýma Resei biliginiń jumysy jaily jalǵan aqparat taratqandarǵa jazany kúsheitý týraly túzetýlerdi maquldady. Oǵan sáikes, 5 mln rýbl nemese on jylǵa deiin túrme jazasy qarastyrylǵan.
Osyǵan deiin Resei prezidenti Vladimir Pýtin batystyń ómir saltyna umtylatyn adamdardy "satqyndar" dep ataǵan. Onyń sózine qaraǵanda, Batys elderi sondai adamdarǵa qoldaý kórsetýge tyrysady.
