QR Premer-Ministriniń orynbasary Eraly Toǵjanov koronavirýs infektsiiasymen kúreste meditsina qyzmetkerlerine tólengen ústemeaqynyń nelikten toqtatylǵanyn túsindirdi, dep habarlaidy QazAqparat.
«Memleket basshysynyń tapsyrmasyn oryndaý úshin 2020 jyldyń naýryzynan COVID-19 koronavirýs infektsiiasymen kúres aiasyndaǵy jumysqa ústemeaqy belgilendi. Ol juqtyrý táýekeliniń deńgeiine bailanysty úsh sanatpen (1-sanat «óte joǵary táýekel» - 850 myń teńge, 2-sanat «joǵary táýekel» - 425 myń teńge, 3-sanat «ortasha táýekel» - 215,5 myń teńge) tólendi. Osy maqsatqa respýblikalyq biýdjetten 2020-2021jyldarǵa 250,8 mlrd teńge bólindi Búginde osy jyldyń qańtar-qyrkúiegi kezeńinde meditsina uiymy qyzmetkerlerine ústemeaqy tolyq kólemde tólendi», - delingen Úkimet basshysy orynbasarynyń Májilis depýtattary saýalyna bergen jaýabynda.
Onyń atap ótýinshe, dárigerlerge ústemeaqy Qazaqstan, jalpy búkil álemde meditsina pandemiiamen kúreske daiyn bolmaǵan kezde engizildi. Ol ýaqytta virýs zertelmegen, emdeý hattamasy únemi aýysyp, meditsina qyzmetkerleri arasynda belgisiz virýstan qorqynysh bar bolatyn. Sondyqtan olardy qosymsha yntalandyrý qajet boldy.
«Búginde ahýal ózgerdi. Qyzmetkerlerdiń virýs táýekelderin múldem joiatyn tiimdi qorǵanys quraldary qalyptasyp, emdeý hattamasy bekitildi. Infektsiiandan qorǵaityn senimdi vaktsinatsiia paida boldy. Buǵan qosa, meditsina qyzmetkerleri alǵashqylardyń biri bolyp vaktsinatsiiaǵa qol jetkizdi. Qazirgi ýaqytta meditsina qyzmetkerleriniń 99 paiyzy ekpe aldy. Búginde revaktsinatsiia júrgizilip jatyr. Ony da meditsina qyzmetkerleri alǵashqylardyń biri bolyp alady», - dedi Eraly Toǵjanov.
Vitse-premerdiń aitýynsha, osyǵan bailanysty 2021 jyldyń 28 mamyrynda ótken Qazaqstan aýmaǵynda COVID-19 koronavirýs infektsiiasynyń paida bolýyna jáne taralýyna jol bermeý jónindegi vedmostvoaralyq komissiia 2021 jyldyń 1 tamyzynan KVI-ge bailanysty tólenetin ústemeaqyny 50 paiyzǵa tómendetý, al 1 qazannan densaýlyq saqtaý júiesi qyzmetkerleri jalaqysyn kóterýdiń jańa ádisterin aiqyndai otyryp alyp tastaý týraly sheshim qabyldanǵan.
«Meditsina qyzmetkerlerin qarjylai qoldaý jáne yntalandyrýdy jalǵastyrý maqsatynda osy jyldyń 1 qazanynan táýekel tobyna bailanysty belgili bir mamandyqtarǵa jalaqyny arttyrý is-sharalary qabyldandy. 2021 jyldyń 1 qazanyna deiin KVI-ge bailanysty buǵan deiin tólenip kelgen ústemeaqy ýaqytsha tólem bolatyn. Al jańa ádiste kózdelgen ústemeaqy qyzmetker jalaqysynyń negizgi bóligine qosylady jáne turaqty túrde tólenedi», - dedi ol.
